Asturies volvió esta selmana a reivindicar el so papel como una de les grandes potencies queseres d’Europa cola presencia de nueve referencies nel Salon du Fromage et des Produits Laitiers, la cita internacional más prestixosa del sector profesional queseru y llácteu, que se celebra ente’l 7 y el 9 de xunu en París Expo Porte de Versailles
La feria, que celebra la so decimonovena edición, aconceya a más de 300 espositores, 450 marques y profesionales procedentes de quince países, convirtiéndose nel principal puntu d’alcuentru internacional pa productores, distribuidores, comerciu especializáu y canal HORECA.
La representación asturiana combina la tradición de les figures de calidá reconocíes pola Unión Europea cola innovación y el puxu de les producciones ecolóxiques. La delegación ta formada polos quesos DOP Afuega’l Pitu, DOP Casín, DOP Gamonéu, DOP Cabrales ya IGP Los Beyos, xunto a les empreses y marques Quesería Asiegu ECO, CampoBio, Quesu Ovin, Los Caserinos y Quesu de Varé.
La presencia asturiana nun ye casualidá. Asturies sigue siendo el territoriu con mayor diversidá quesera d’Europa, con más de cuarenta variedaes identificaes y cinco figures de protección europea: les denominaciones d’orixe protexíes Cabrales, Gamonéu, Afuega’l Pitu y Casín, y la Indicación Xeográfica Protexida Los Beyos. Estes certificaciones constitúin la columna vertebral d’un sector que combina tradición, paisaxe y producción artesanal.
La participación nel certame parisín llega nun momentu especialmente relevante pa los quesos asturianos. Les DOP y la IGP consoliden la so presencia nos mercaos nacionales y internacionales al empar que medra l’interés polos productos artesanos, de proximidá y venceyaos al territoriu. Cabrales y Gamonéu continúen siendo les grandes referencies internacionales de la producción asturiana, pero nos últimos años Afuega’l Pitu, Casín y Los Beyos fueron ganando reconocencia ente distribuidores y consumidores especializaos.
A esta fortaleza súmase’l xorrecimientu de les producciones ecolóxiques y de nueves queseríes que tán apostando pola diferenciación y la calidá. La presencia de marques como Quesería Asiegu ECO, CampoBio o Quesu Ovin amuesa la capacidá del sector asturianu pa combinar la herencia quesera con modelos productivos adaptaos a les nueves demandes del mercáu.
El Salon du Fromage constitúi una oportunidá única pa dar a conocer estos productos ante miles de profesionales de la distribución, la restauración y el comerciu especializáu. Nun escaparate onde compiten dalgunos de los meyores quesos del mundu, la presencia de nueve referencies asturianes confirma la bona salú d’un sector que sigue siendo unu de los grandes emblemes gastronómicos d’Asturies.
This work is licensed under a Creative Commons Attribution 4.0 International License.
