L’Asociación Mas Curiadores d’Asturies Pilar Díaz convoca una concentración pa esti xueves 5 de payares, a les 11:00 hores, énte la Xunta Xeneral. La movilización reclama reconocimientu llaboral, protección económica y midíes que permitan a les persones curiadores atender a los sos familiares ensin sacrificar la so propia vida ya’l so futuru.
Miles de families dependen cada día d’un trabayu imprescindible que, endemasiaes vegaes, remanez invisible y nun recibe’l reconocimientu social y económicu que merez. Son les persones que curien de familiares con discapacidá, enfermedaes graves o situaciones de dependencia, una responsabilidá que puede ocupar les venticuatro hores del día y que, davezu, obliga a abandonar un emplegu, amenorgar ingresos o renunciar a proyectos personales.
Pa denunciar esta situación, l’Asociación Mas Curiadores d’Asturies Pilar Díaz, presidida pola llenense Arancha Herrero Martínez, convocó una concentración énte la Xunta Xeneral del Principáu, n’Uviéu, pa esti xueves 5 de payares, a les 11:00 hores.
Baxo’l llema «Curiar ye trabayar y merez drechos», les convocantes quieren poner nel centru del alderique públicu una realidá que sigue ensin una protección acordies cola dedicación y les responsabilidaes que supón.
Una de les principales revindicaciones ye’l reconocimientu xurídicu y llaboral de les persones curiadores principales, con una compensación económica digna que tenga en cuenta les hores de dedicación y les condiciones nes que desendolquen esti trabayu.
L’asociación reclama igualmente una cotización efectiva a la Seguridá Social que garantice una xubilación digna. Pa munches, dedicar años o décades a atender a un familiar implica abandonar el mercáu llaboral o reducir les xornaes, con consecuencies directes sobre los ingresos presentes y les pensiones futures.
Anque existen mecanismos de cotización pa determinaes persones curiadores non profesionales, les revindicaciones van más allá y planteguen la necesidá d’una protección integral que contemple la realidá del curiau continuáu.
Tamién reclamen servicios d’aliendu familiar, ayudes compatibles ente elles y recursos públicos abondos que permitan repartir les responsabilidaes y disponer de tiempu pa descansar, atender la propia salú o caltener una vida personal y social.
La situación económica de munches families agrávase cuando les prestaciones resulten insuficientes o’l so furrulamientu xenera incertidume.
La situación de les mas curiadores pon de manifiestu una desigualdá persistente: les responsabilidaes de curiau siguen recayendo de manera desproporcionada sobre les muyeres, condicionando les sos oportunidaes llaborales y la so independencia económica.
La dedicación continuada puede provocar agotamientu físicu y emocional, problemes de salú, aisllamientu social y dificultaes económiques, especialmente cuando nun existen redes familiares o servicios públicos suficientes.
Esta realidá resulta particularmente preocupante n’Asturies, onde la dispersión territorial, la falta servicios na fastera rural y l’avieyamientu de la población planteguen retos importantes pa l’atención a la dependencia y l’accesu a servicios de proximidá.
A ello súmense les demores na tramitación de les prestaciones. Según los datos del Observatoriu Estatal de la Dependencia, Asturies llegó a superar l’añu d’espera pa resolver los espedientes, una situación que tresllada a les families una parte importante del pesu de los curiaos mientres nun reciben los recursos que precisen.
Les organizaciones reclamen que les alministraciones dexen de considerar esta responsabilidá como una cuestión exclusivamente familiar y reconozan el papel que desempeñen estes persones nel caltenimientu del sistema de curiaos.
Tamién reclamen protección específica pa les families cuando’l curiau s’interrumpe o fina la persona dependiente, una circunstancia que puede dexar a quien dedicó años a esta responsabilidá ensin ingresos nin posibilidaes inmediates de reincorporase al mundu llaboral.
Los problemes del sistema asturianu vienen siendo oxetu de denuncies reiteraes. N’ochobre, les organizaciones de pensionistes volvíen reclamar soluciones a les llistes d’espera de dependencia, insistiendo na necesidá de que los drechos reconocíos se traduzan en prestaciones efectives y ensin demorances.
La concentración d’esti xueves pretende facer llegar estes demandes a los representantes políticos asturianos y reclamar una implicación más decidida de les alministraciones públiques.
L’alderique sobre’l reconocimientu de les persones curiadores coincide con otros procesos de reforma de los servicios sociales. En setiembre entamó la tramitación de la futura Llei del Tercer Sector d’Acción Social, una iniciativa centrada nel reconocimientu de les organizaciones sociales y na so rellación cola Alministración. Magar se trata d’un ámbitu distintu, dambes cuestiones ponen sobre la mesa la necesidá de reforzar los recursos públicos y los drechos de les persones que caltienen los curiaos
La convocatoria coincide col Día Internacional de les Persones Curiadores, una fecha dedicada a reconocer el llabor de quien sostienen diariamente l’atención a les persones que necesiten sofitu.
Pa les convocantes, nun se trata namás d’agradecer un sacrificiu personal, sinón de garantizar drechos efectivos. Porque tres de cada persona dependiente hai, en munchos casos, otra persona que dedica una parte fundamental de la so vida a curiala, davezu con escasu descansu y ensin una protección económica suficiente.
La concentración va cellebrase esti xueves 5 de payares, a les 11:00 hores, énte la Xunta Xeneral del Principáu, n’Uviéu.
This work is licensed under a Creative Commons Attribution 4.0 International License.
