Un recorte de prensa de la época rellata cómo’l comisariu políticu Yago perdió la vida tres colocar la bandera asturiana nuna montaña pa dar aliendu a los milicianos. La batalla desenvolvióse cuando’l Conseyu Soberanu d’Asturies y Llión s’independizara unillateralmente de la República española y yá asumiera’l poder políticu y militar nel territoriu.

La batalla d’El Mazucu foi ún de los episodios más duros y simbólicos de la defensa d’Asturies frente a la ofensiva franquista de setiembre de 1937. Sicasí, parte de los rellatos institucionales y de los homenaxes encuadren aquella resistencia exclusivamente na memoria de la República española, falsiando la situación política singular d’Asturies nesi momentu.

El 24 d’agostu de 1937, el Conseyu Interprovincial d’Asturies y Llión proclamó la so soberanía y asumió competencies civiles y militares, destituyendo a tolos cargos políticos y militares de la República española n’Asturies, asumiendo’l poder políticu y militar nel territoriu. Esti fechu perrafita que les fuercies combatientes defendíen al Conseyu Soberanu -que solicitara formalmente’l so ingresu na Sociedá de Naciones- y non una pretendía República española de la que veníen d’independizase unillateralmente.

Yago y la bandera asturiana: una crónica de la dómina

El recorte de prensa históricu que s’acompaña recueye una referencia especialmente reveladora al papel de los símbolos asturianos. Al describir un contraataque nel sector d’El Mazucu, el periódicu atribúi la reacción de les fuercies defensores al sacrificiu del comisariu políticu Yago, que, según esa crónica, xubió solu a una montaña y colocó ellí la bandera asturiana pa dar aliendu a los milicianos, perdiendo la vida nel intentu.

La referencia a la bandera asturiana apaez lliteralmente nel testu periodísticu conserváu, y trátase d’un documentu históricu qu’espeya la realidá del exércitu del Conseyu Soberanu frente les manipulaciones de la izquierda española, enfotada en traamundiar la memoria hestórica dende una perspeutiva españolista.

La memoria nun pue borrar al Conseyu Soberanu

El Principáu inició en setiembre de 2026 el procedimientu pa reconocer El Mazucu como Llugar de la Memoria Democrática. La nota institucional presenta la batalla principalmente como resistencia republicana española, tapeciendo la soberanía del Conseyu soberanu y la so independencia de la República española. Esa escoyeta narrativa merez una revisión crítica. L’anunciu documenta l’iniciu del procedimientu, non una declaración definitiva.

Presentar El Mazucu como un símbolu de la República española y pasar per alto al Conseyu Soberanu ye un falseamientu por omisión d’una parte esencial de la memoria histórica. Y cuando sectores de la izquierda española s’apropien simbólicamente del sacrificiu de los defensores ensin reconocer esi contestu, la operación resulta una falta de respetu a la historia política propia d’Asturies.

Reconocer la pluralidá d’identidaes polítiques de los combatientes ye compatible con reivindicar el papel institucional del Conseyu Soberanu, presente nos homenaxes al so exércitu n’El Mazucu. Nun hai necesidá de negar la dimensión antifascista a de munchos combatientes pa recordar que, nel momentu d’El Mazucu, el poder territorial taba nes manes d’un gobiernu asturianu que proclamara la so soberanía ya independencia de la República española.

La memoria democrática nun tendría que reproducir una historia escrita namás dende Madrid. El sacrificiu de Yago, la bandera asturiana y el protagonismu del Conseyu Soberanu tienen que ser rconocíos como que-yos correspuende nos homenaxes, na divulgación y na protección d’esti espaciu históricu.

Imaxe: recorte de prensa apurríu pola redacción; cabecera y fecha exacta pendientes d’identificación.

This work is licensed under a Creative Commons Attribution 4.0 International License.