Les previsiones de BBVA Research asitien l’aumentu del PIB asturianu nel 1,9%, siete décimes perbaxo la media estatal. La escasa creación d’emplegu prevista refuerza l’esmolecimientu poles oportunidaes y los medios de vida de la población.

Asturies comparte con La Rioja la previsión de menor xorrecimientu económicu del Estáu pa 2026. Según l’Observatoriu Rexonal de BBVA Research, espublizáu’l 15 d’ochobre, dambos territorios rexistraríen un aumentu del productu interior brutu (PIB) del 1,9%, frente al 2,6% previstu pal conxuntu estatal. Son los únicos territorios  que quedaríen perbaxo’l 2%. 

La distancia resulta significativa: mientres la Comunidá Valenciana encabezaría’l crecimientu con un 2,9%, Madrid, Andalucía y Murcia algamaríen el 2,8%. L’informe apunta al encarecimientu de la enerxía, la debilidá de la demanda europea y el poco dinamismu de les esportaciones de bienes y de la producción industrial como factores que condicionen l’avance de les economíes del norte. Sicasí, tando al norte, Galicia medra un 2,3, Cataluña un 2,6 ya’l País Vascu un 2,2.

Esti escenariu conecta col esmolecimientu pola evolución del texíu productivu asturianu, onde la creación d’empreses convive cola perda d’emplegu industrial. 

El PIB mide’l valor de los bienes y servicios finales producíos nun territoriu a lo llargo d’un periodu. Sirve pa conocer la evolución de l’actividá económica, seique nun equival al dineru que llega a cada casa. Un aumentu del PIB nun garantiza que medren los salarios, que baxen los alquileres o que meyoren los servicios públicos, pero el so estancamientu asegura qu’habrá dificultades mayores en xeneral.

La previsión llaboral pa 2026 añade un motivu de preocupación. BBVA Research calcula que l’emplegu n’Asturies, midíu en términos de la Encuesta de Población Activa, aumentaría namás un 0,2%, frente al 2,4% estatal. Ye l’incrementu más baxu del estáu y apunta a un escasu dinamismu na creación d’oportunidaes llaborales.

El xorrecimientu económicu nun tendría de considerase un oxetivu por sí mesmu. Dende les corrientes del decrecimientu reclámase amenorgar de manera planificada y xusta l’usu de materiales y enerxía nes economíes más consumidores, como respuesta a los llendes ecolóxicos del planeta. L’alderique plantega cómo garantizar una vida digna ensin depender d’una espansión indefinida de la producción y del consumu. El mesmu IPCC recueye que ye posible combinar niveles de vida dignos con una demanda enerxética menor, mediante cambios na organización de los servicios, les infraestructures y los modelos de consumu. Una transición d’esti tipu esixe redistribución de la riqueza, protección social y refuerzu de los servicios públicos, trátase d’un procesu planificau y con proyeición social. El menor dinamismu económicu nun indica que se tea avanzando hacia esi modelu. 

Lo que sí dibuxen estes previsiones ye una Asturies con menos puxu económicu y una creación d’emplegu casi estancada. Esa combinación abre un riesgu pa les condiciones de vida y esixe que se tomen decisiones darréu. 

This work is licensed under a Creative Commons Attribution 4.0 International License.