Opinión: Llucía Fernández Marqués

A ver, nun vamos facenos idegues rares: naide nun esperaba de la Casa Real española un discursu a favor del pueblu que traten de someter, nin un ápice d’empatía, incompatible con una familia y una institución destacables polos sos rasgos sicópates —a la historia me remito—. Sicasí, la hipocresía de la princesita nun pue pasar desapercibida.

La princesa Leonor tuvo los tolanos d’invocar nel Campoamor a la so xeneración, afalándola a «tener esperanza y confiar». Ye fácil confiar, suponemos, dende’l púlpitu de los sos descomanaos privilexos; mentanto, a pocos metros, la Escandalera acoyía una acampada entamada por xente de la so xeneración que reclamaba’l drechu a tener onde vivir. El contraste dexa albentestate la distancia ente la retórica de la Corona y les condiciones materiales de la mocedá a la que pretende representar —y someter—. Pero, sobremanera, rescampla la hipocresía más xabaz.

«Los jóvenes nos hacemos preguntas». Con estes pallabres, Leonor de Borbón introduxo nel so discursu del 23 d’ochobre una reflexón sobre «les dificultaes de la so xeneración». Non, mocina, la mocedá nun se fai entrugues: la mocedá tien yá respuestes. La llácara capitalista y los parásitos como tú son los que la tienen somorguiada na miseria. Sábenlo, sábeslo y el restu ye cuentu.

Fuera del Teatru Campoamor, a pocos metros del atril, había una acampada que llevaba tres selmanes na Escandalera reclamando’l drechu a una casa y a un nivel de vida medianamente dignu. La solidaridá de la Casa Real española pa con quienes acampaben foi tanta que, durante la ceremonia, la protesta quedó arrodiada por un ampliu dispositivu policial.

El problema de la vivienda tien causes económiques y responsables políticos, ente los que s’alcuentra la so familia y los miembros de la Fundación Princesa -recordemos, los principales bancos del estáu, pente otros-; esto nun se resuelve recuperando l’entusiasmu. Yá nun tamos nesa época histórica na que podía pidise a un pueblu illetráu que confiare ciegamente nos sos mandatarios, impuestos por lleis divines y sieglos de privilexos.

Na plaza, el portavoz del Sindicatu d’Inquilines n’Asturies, Andrés García, esplicaba que la protesta cuestionaba tamién a la clase política y económica reunida nel Campoamor y la so distancia respecto de los problemes de vivienda y de los drechos llaborales.

El distanciamientu ente la monarquía y el pueblu nun ye novedá. La institución perpetúa una desigualdá d’orixe: impón la Corona española a Asturies, reserva la xefatura del Estáu a una familia y presenta la continuidá dinástica como un bien común. D’eso precisamente van los Premios Princesa, como reconoz esplícitamente la so Fundación: de promocionar y tratar de crear venceyos ente’l pueblu asturianu y la monarquía española. Cuando hai qu’invertir tanto en crear unos teóricos venceyos, ye qu’estos nun esisten.

Cuando la heredera incorpora al so discursu les angusties de quienes carecen de les sos seguridaes, ensin reconocer esa contradicción, la pretendida cercanía conviértese nuna hipocresía insultante.

La esperanza, esa sí, taba na Escandalera. Taba na capacidá d’organizase, de sostener una acampada y de reclamar públicamente una vida digna pa toos y pa toes. 

This work is licensed under a Creative Commons Attribution 4.0 International License.