Uviéu y Xixón concentren la mayor parte de les incidencies rexistraes, anque’l mapa sigue incompletu en delles zones. Cuasi ocho de cada diez casos detectaos nun correspuenden a árboles que falten, sinón a exemplares yá plantaos que presenten problemes de caltenimientu, frazaes inadecuaes, alcorques ruinos u otres actuaciones que comprometen el so desendolcu
L’Ecomapeu «¡Equí falta un árbol!» permitió llocalizar esti fin de selmana 3.573 incidencies rellacionaes col arboláu urbanu n’ocho llocalidaes d’Asturies. Decenes de persones voluntaries percorrieron cais y barrios pa identificar árboles desapaecíos, baltaos, secos o en mal estáu, amás d’exemplares afeutaos por actuaciones consideraes non afayadices.
Nel entamu yeren seis conceyos asturianos los que diben mapear los espacios onde faltaba arboláu urbanu, pero finalmente la iniciativa amplióse hasta ocho llocalidaes. Uviéu concentra’l mayor númberu d’incidencies, con 1.462, siguida de Xixón, con 1.061; Mieres del Camín suma 489, La Pola Llaviana 308, Avilés 110, Tapia 66, Villaviciosa 40 y Llanes 37.
Los resultaos pueden consultase en ecomapa.org, onde les incidencies apaecen xeorreferenciaes sobre’l mapa. Dende la organización alvierten, sicasí, de que les cifres nun representen la totalidá de los problemes existentes y van siguir aumentando a midida que s’incorporen nueves zones y participantes.
Con 1.462 incidencies, Uviéu ye la llocalidá onde más deficiencies se rexistraron. La cifra ye especialmente significativa porque, según la organización, inda queda más de la metá de les cais de la ciudá por mapear.
El resultáu apunta a un problema que nun se llenda a la falta d’árboles, sinón que tien que ver tamién cola manera en que se diseñen y caltienen los espacios urbanos. 
En Xixón rexistráronse 1.061 incidencies, una cifra que vuelve poner el focu sobre la calidá del espaciu urbanu. La organización destaca como una de les principales carencies de la ciudá la sustitución d’árboles mauros por exemplares nuevos, una práctica que fai perder durante años buena parte de los beneficios ambientales que proporcionaba l’arboláu anterior.

La cuestión encaxa nun alderique más ampliu sobre la calidá ambiental de Xixón. Hai namás unos díes, 1.200 persones apuntábense a la marcha Xixón Respira pola movilidá sostenible y una ciudá más habitable. Al mesmu tiempu, la ciudá sigue arrastrando problemes recurrentes de contaminación atmosférica, especialmente na zona oeste, onde esti añu volvió activase’l protocolu anticontaminación.

Una de les conclusiones más importantes del Ecomapéu ye que’l problema nun consiste namás en llantar más. Según los datos de la organización, casi ocho de cada diez incidencies tienen que ver colos árboles que yá tán llantaos.

Ente les deficiencies detectaes apaecen alcorques demasiado pequeños, espacios cubiertos con formigón supuestamente drenante, frades realizaes fuera de temporada y exemplares que nun disponen d’espaciu suficiente pal desendolcu de los raigaños.

D’ehí vien el mensaxe central de la campaña: fai falta más arboláu, pero sobre too fai falta curiar el que yá existe.

La sustitución d’un árbol maduru por un exemplar nuevu nun compensa de manera inmediata la perda. Tienen que pasar décades hasta que’l nuevu árbol pueda aportar una solombra, capacidá de captación de contaminantes, regulación térmica y valor ecolóxicu asemeyaos a los del exemplaru sustituyíu.

Un exemplu reciente d’esta preocupación producióse n’Avilés, onde el Colectivu Ecoloxista pidió desplicaciones pol baltu de nueve árboles mauros na avenida de San Agustín.

El casu de Mieres del Camín, con 489 rexistros, tien una particularidá importante: el trabayu voluntariu permitió percorrer práuticamente tola zona urbana. Por eso, anque’l númberu d’incidencies ye menor que’l d’Uviéu o Xixón, el mapa mierense ufre una semeya más completa de la situación real.

N’otres llocalidaes el trabayu sigue mui parcial. N’Avilés, por exemplu, la participación foi menor y queden amplios sectores ensin revisar.

La iniciativa tamién llegó a núcleos más pequeños como La Pola Llaviana, Tapia, Villaviciosa y Llanes, onde’l númberu absolutu d’incidencies ye menor, pero onde’l mapa permite detectar igualmente carencies y práctiques susceptibles de meyora.

La primera fase del Ecomapéu nun termina col recuentu d’esti fin de selmana. Agora va entamase un procesu de revisión y validación de la información introducida poles persones participantes, col oxetivu de correxir posibles errores y meyorar la calidá de los datos.

Dempués, la intención ye volver abrir la plataforma pa que la ciudadanía pueda siguir incorporando incidencies y completar los barrios, cais y llocalidaes que quedaron fuera.

Los resultaos finales van treslladase a les distintes alministraciones locales como una ferramienta ciudadana pa identificar necesidaes y reclamar una xestión más eficaz del arboláu urbanu.

This work is licensed under a Creative Commons Attribution 4.0 International License.