La organización ambiental solicitó información al Conceyu sobre la retirada de nueve exemplares mauros nel ámbitu d’unes obres de reurbanización que van reorganizar l’aparcamientu. El proyectu municipal prevé 54 places pa turismos, cuatro más de les qu’había, amás de renovar les redes de servicios y les aceres.

Estos son los árboles anantes del baltu

El Colectivu Ecoloxista d’Avilés solicitó información al Conceyu pol baltu de nueve árboles na avenida de San Agustín, unos exemplares que, según la organización, yeren mauros, taben sanos y nun representaben nengún riesgu pa les persones que transiten pela zona. Los ecoloxistes quieren conocer les razones técniques que xustifiquen la so retirada y la relación de la tala coles obres de reurbanización que se desarrollen nesti espaciu.

El Conceyu d’Avilés presentó en payares de 2025 un proyectu pa modificar y reurbanizar la isleta d’aparcamientu de l’avenida de San Agustín como respuesta a la eliminación de places provocada poles obres del carril bus impulsáu pol Principáu. Según la información municipal, la nueva ordenación va disponer de 54 places pa turismos, dos pa persones con movilidá reducida y tres pa motos. El propiu Conceyu señaló entós que la operación permitiría mantener l’aparcamientu existente y, finalmente, incrementalu en cuatro places.

La información pública municipal describe con detalle la distribución de les places d’aparcamientu y les actuaciones sobre les infraestructures, pero nun fai referencia específica a la retirada d’estos nueve árboles, a les razones que la xustifiquen nin a una eventual reposición. Ye precisamente esa información la que reclama agora’l colectivu ambiental.

La cuestión tien especial relevancia nuna ciudá onde la contaminación atmosférica vien siendo oxetu de siguimientu dende hai años. En 2023, InfoAsturies recoyía les alvertencies de la Coordinadora Ecoloxista y del propiu Colectivu Ecologista d’Avilés ante unos valores especialmente elevaos de partícules na contorna avilesina. La presencia d’arboláu urbano nun elimina l’orixe d’esa contaminación, pero sí forma parte de les ferramientes disponibles pa reducir la esposición de la población y meyorar la calidá ambiental de les cais.

Los árboles dan solombra, contribúin a reducir les temperatures, valen d’hábitat y alimentu pa diferentes especies y participen nel filtráu de contaminantes atmosféricos. La so función cobra más importancia nel actual contestu climáticu, nel que Asturies entama a rexistrar episodios de calor cada vegada más frecuentes. 

La función térmica del arboláu ye especialmente importante nos espacios cubiertos por asfaltu, formigón y otros materiales que acumulen radiación solar. La solombra y la evapotranspiración contribúin a reducir l’efectu d’islla de calor urbana, polo que’l caltenimientu de zones verdes y árboles maduros forma parte de les estratexes d’adaptación de les ciudaes al calentamientu global.

A ello súmase la capacidá de la vexetación pa retener partícules y absorber determinaos contaminantes gaseosos. La relación ente contaminación atmosférica y salú nun se circunscribe a les zones industriales del centru d’Asturies.

El Colectivu Ecoloxista señala tamién que la perda d’un árbol maduro nun puede compensase de manera inmediata cola plantación d’un exemplar nuevu. Un árbol recién plantáu necesita años pa desendolcar una copa, una superficie foliar y un sistema radicular comparables a los d’un exemplar adultu y, por tanto, pa proporcionar niveles asemeyaos de solombra, captación de contaminantes y soporte pa la biodiversidá.

N’Avilés, la preocupación de los colectivos ambientales pola planificación del territoriu y los sos posibles efectos sobre la salú y el mediu ambiente afecta tamién a otros proyectos. Esti añu, por exemplu, el Colectivu Ecoloxista cuestionó la tramitación de nuevos parques de bateríes nel conceyu y na so contorna, dientro d’un alderique más ampliu sobre cómo compatibilizar les nueves infracadarmes cola protección ambiental.

This work is licensed under a Creative Commons Attribution 4.0 International License.