L’antigua Casa de Cultura de Tapia acueye hasta’l 4 d’ochobre «Que 20 años no es nada», una esposición construyida con testimonios, imáxenes y materiales de más de dos décades de movilización contra los sucesivos proyectos de mina d’oru en Salave. La muestra llega cuando’l conflictu sigue ensin poder considerase definitivamente zarráu.

Más de dos décades de resistencia vecinal a los proyectos mineros de Salave pasen agora de la cai a una esposición. L’antigua Casa de Cultura de Tapia acueye dende esti sábadu 19 de setiembre «Que 20 años no es nada», una muestra que reconstruye dende dientro la historia d’unu de los conflictos ambientales más persistentes d’Asturies.

La esposición ta entamada por Cultura contra el Expolio y l’Asociación Cultivarte, cola collaboración de la Plataforma Oru Non. Testimonios, fotografíes, documentos y materiales recoyíos durante estos años sirven pa esplicar non solo les distintes fases del proyectu mineru, sinón tamién cómo les vivió la población que lleva enfrentándose a elles.

La muestra va poder visitase hasta’l 4 d’ochobre con entrada llibre. De llunes a vienres va abrir de 18:30 a 21:00 hores y les fines de selmana, de 13:00 a 14:30 y de 19:00 a 21:00. La inauguración celebróse esti sábadu a les siete de la tarde.

La memoria que recueye la esposición nun ye arqueoloxía política. A finales d’agostu volvió conocese que EMC Gold preparaba un nuevu intentu pa reactivar la mina d’oru de Salave. Dempués de tantos proyectos reformulaos, procedimientos y recursos, la oposición local tien motivos pa nun dar el conflictu por definitivamente acabáu.

Una de les victories más significatives llegó esti añu cuando el TSXA avaló la decisión del Conceyu de Tapia de nun modificar el planeamientu urbanísticu pa facilitar la mina. La sentencia confirmó que nun existe una obligación de camudar el PGOU a pidimientu d’una empresa privada y respaldó los valores naturales, paisaxísticos y agrarios que motivaron la protección de los terrenos.

En payares de 2025 produxérase otru xiru cola retirada del proyectu mineru del procedimientu de Proyectu d’Interés Estratéxicu Rexonal. Cada revés al proyectu pareció abrir la posibilidá d’un final, pero cada nuevu movimientu empresarial volvió demostrar por qué la resistencia se mide yá en décades.

Hubo momentos nos que les instituciones caminaron precisamente na dirección contraria a la posición mayoritaria espresada nel conceyu. En 2025, la decisión de siguir tramitando’l proyectu pese a la oposición de Tapia volvió poner sobre la mesa un problema democráticu de fondu: hasta ónde puede llegar la promoción d’un gran proyectu estractivu cuando’l territoriu que tendría que soportalu lu refuga de manera sostenida.

Salave tampoco ye un casu aislláu dientro del discutiniu sobre minería y territoriu. La campaña de Salvemos Peñamayor contra los permisos mineros demuestra que la tensión ente estractivismu, protección ambiental y capacidá de decisión local apaez en más zones del país.

«Que 20 años no es nada» tien, poro, un valor que supera’l d’una retrospectiva. Documenta cómo una comunidá foi obligada a defender una y otra vegada’l mesmu territoriu frente a proyectos que camuden de formulación, propietarios o vía administrativa. Y recuerda una cuestión elemental: la participación pública nun puede consistir en preguntar a la población hasta que la respuesta coincida cola del promotor.

This work is licensed under a Creative Commons Attribution 4.0 International License.