I Simultánea de Cumes, l’añu pasáu

El Colectivu Salvemos Peñamayor convocó pa esti próximu 24 de mayu una concentración dientro de la II Simultánea de Cumes, una movilización cola que’l colectivu quier volver visibilizar la oposición social al proyectu d’investigación minera promovíu na sierra.

Dende la organización recuerden que’l permisu d’investigación minera sigue vixente “pese a los incumplimientos llegales que impliquen la caducidá del permisu”, polo que consideren que Peñamayor “sigue baxo amenaza”. Per ello, animen a la ciudadanía a sumase a la convocatoria y “apoyar la causa pa protexer el monte”.

La protesta llega amás nuna selmana que’l colectivu considera clave. Según esplicaron, yá se-yos fixeron llegar al presidente del Principáu, Adrián Barbón, documentos nos que, aseguren, la empresa Asturmet “pon negro sobre blanco el pocu rigor técnicu y los incumplimientos nos que ta incurriendo en rellación col permisu d’investigación minera en Peñamayor”.

Esos documentos son precisamente los que tien de valorar agora la Conseyería correspondiente, nuna decisión que podría resultar determinante pal futuru del proyectu. Dende Salvemos Peñamayor recuerden que la fecha na que podría producise l’aprobación por silenciu alministrativu “ta mui cerca”, polo que reclamen una actuación clara y acorde cola normativa vixente.

“Toca demostrar la tresparencia y el rigor normativu que tanto pregonen”, señalen dende’l colectivu, que considera que “la única salida digna” pasa pola declaración de caducidá del permisu mineru.

La II Simultánea de Cumes pretende convertir de nuevu les montañes nun espaciu de reivindicación ambiental y defensa del territoriu. La convocatoria del 24 de mayu busca xuntar a vecinos, colectivos y persones comprometíes cola protección de Peñamayor pa llanzar un mensaxe claru contra’l proyectu mineru baxo’l lema: “¡Caducidá d’Astur A yá!”.

Más información puede consultase na web de Salvemos Peñamayor.

This work is licensed under a Creative Commons Attribution 4.0 International License.