Tres internos mayores d’edá del Centru de Responsabilidá Penal de Menores de Sograndio fueron treslladaos a un centru penitenciariu d’adultos. La decisión llega dempués de la tramitación nos xulgaos de menores de los correspondientes procedimientos pa valorar la so permanencia nel equipamientu asturianu.

El conseyeru de Facienda, Xusticia y Asuntos Europeos, Guillermo Peláez, confirmó que les resoluciones tán cerraes, anque evitó dar datos personales amparándose na normativa de protección de datos. El Gobiernu asturianu insiste en que’l simple fechu de superar los 18 años nun convierte automáticamente a una persona nun internu más conflictivu, pero reconoce que determinaos perfiles adultos tuvieron protagonismu en conflictos recientes.

El casu ye una de les manifestaciones más visibles de la crisis que vien atravesando Sograndio. El Principáu fala d’una presión elevada pol númberu d’internos y d’una situación «escepcional», con comportamientos violentos que, según la Conseyería, nun se producieren anteriormente con estes característiques y pa los que nin les infraestructures nin dalgunos dispositivos de seguridá taben preparaos.

La respuesta inmediata suma 935.000 euros d’inversión nes últimes selmanes. Les actuaciones inclúin nueves unidaes d’aislamientu, intervenciones nel valláu y les cámares de videovixilancia, contratación d’auxiliares de servicios y diverses reparaciones. El Gobiernu anuncia amás una revisión de protocolos de atención sanitaria y coordinación coles fuerces de seguridá.

Pa 2027, la Conseyería anuncia nueves places de personal educador, enfermería y mantenimientu, xunto colaVista previa de los cambios (abre en una nueva pestaña) reorientación de programes socioeducativos pa responder a los perfiles actuales. Paralelamente sigue la tramitación d’un nuevu centru de menores na mesma parcela de Sograndio, que’l Gobiernu quier llevar cuanto antes al Conseyu de Gobiernu.

Hai una distinción imprescindible antes de convertir esti casu n’arma política: Sograndio ye un centru de **responsabilidá penal de menores**, non un recursu ordinariu de protección o acoyida. Nun ye’l mesmu sistema que’l que protagonizó la polémica de La Florida, onde’l racismu acabó instrumentalizando a menores tutelaos al tiempu que’l Principáu improvisaba la so protección.

Mesturar deliberadamente dambes realidaes namás sirve pa xenerar mieu. Nel casu de La Florida hubo una movilización vecinal contra’l racismu y en sofitu de los menores d’acoyida, precisamente frente a un discursu que pretendía presentar a neños y adolescentes como un problema de seguridá.

Esa construcción del mieu funciona seleicionando qué persones merecen protección y cuáles pueden convertise en sospechoses. El mecanismu foi analizáu nel debate sobre racismu, aporofobia y la división ente “foriatos bonos” y “foriatos malos”. Sograndio necesita seguridá, recursos y control institucional; nun necesita ser utilizáu pa alimentar estigmes sobre tola mocedá migrante o tutelada.

La respuesta social frente a esos discursos yá quedó clara cuando vecinos y colectivos afirmaron que el racismu nun tien cabida nos barrios d’Uviéu. Defender esa posición ye compatible con esixir que los centros de responsabilidá penal tengan plantiyes suficientes, instalaciones segures y programes socioeducativos que funcionen.

Tampoco hai base pa convertir la criminalidá nuna etiqueta étnica o d’orixe. Los datos sobre delitos amuesen, por exemplu, que tres de cada cuatro delitos n’Asturies tienen homes como protagonistes y esa proporción chega al 98% nos delitos sexuales, ensin que naide proponga estigmatizar colectivamente a los homes como amenaza social.

La crisis de Sograndio tien que analizarse onde realmente ta’l problema: capacidá del centru, perfiles de los internos, seguridá, personal, programas y dirección. Treslladar a tres persones adultes puede resolver situaciones concretes, pero nun sustituye una política estable. Si’l Principáu admite que la situación ye escepcional y que’l dispositivu nun taba preparáu, toca esplicar cómo se llegó hasta equí y cómo va evitar que vuelva repetise.

This work is licensed under a Creative Commons Attribution 4.0 International License.