La circulación volvió esti vienres a los cuatro carriles de l’autopista del Güerna na zona afectada pol gran argayu del 10 de payares de 2024. La reapertura completa producióse a les 15:00 hores, dempués de casi dos años nos que la principal vía de comunicación por carretera ente Asturies y la Meseta funcionó con restricciones, desvíos provisionales y una capacidá amenorgada.

El desprendimientu producióse nel entornu del puntu quilométricu 75,7 de la AP-66 y obligó a cortar por completu la circulación. El tráficu pudo recuperase parcialmente’l 27 de payares de 2024 gracies a un bypass provisional, pero dende entós la zona siguió condicionada poles obres d’estabilización de la lladera.

Los trabayos tuvieron que facer frente a una situación xeotécnica especialmente complexa. La solución aplicada consistió nun reperfiláu progresivu del talud, empezando pela parte cimera y baxando en bancos de cinco metros. En total construyéronse 17 bancos sobre una lladera d’alredor de 90 metros d’altura. La concesionaria adjudicara la restauración a Luperlan Tunneling por más de 7,5 millones d’euros.

La recuperación de los cuatro carriles ye una bona noticia pa conductores y tresportistes, pero nun significa que la AP-66 recupere entá una normalidá completa. Les obres de modernización de los túneles siguen provocando afecciones y el sector del tresporte mira agora especialmente a El Negrón, onde continúen restricciones derivaes de los trabayos.

Y, sobre too, la reapertura nun resuelve’l conflictu políticu y xurídicu del peaxe. La discusión lleva años abierta y movimientos asturianistes vienen reclamando que les instituciones pasen de les declaraciones a actuaciones efectives contra’l peaxe del Güerna.

La polémica nun nació col argayu. Yá en 2024, antes de la gran incidencia que degradó todavía más el serviciu, Asturies encaraba otru añu ensin que s’eliminara’l peaxe de la principal conexón viaria cola Meseta. Y en 2023 volvía anunciase una nueva xubida de la tarifa, reforzando un agraviu que se prolonga décades.

Hai incluso propuestes polítiques que plantegaron una salida estructural distinta al modelu concesional, como la nacionalización de l’autopista del Güerna. La cuestión de fondu sigue siendo por qué Asturies tien que pagar por una comunicación básica cola Meseta que n’otros territorios forma parte de la rede pública ensin un canon comparable.

El Principáu reclamó esti branu la suspensión o bonificación total del peaxe mientres persistieren les deficiencies del serviciu y llegó a proponer sanciones por 1,1 millones d’euros a Aucalsa pol cobru íntegru de la tarifa y pola información facilitada a les persones usuaries. Paralelamente, el Gobiernu asturianu anunció’l recursu al Tribunal Supremu contra la negativa del Ministeriu de Tresportes a revisar la prórroga de la concesión hasta 2050.

La importancia de la vía vuelve facese evidente cada vegada que llega una operación especial de tráficu, como la operación retornu con cientos de miles de desplazamientos n’Asturies. El Güerna nun ye una carretera secundaria: ye una infraestructura estratéxica pa la movilidá de la población y pal tresporte de mercancíes.

Acabó l’argayu como escusa pa tener dos carriles menos nesi puntu. Nun acabaron nin les restricciones nel conxuntu de la vía nin, muncho menos, el problema políticu del peaxe. La normalidá real llegará cuando viajar ente Asturies y la Meseta nun implique pagar por una infraestructura básica sometida durante años a obres, incidencies y una concesión que sigue nel centru del conflictu.

This work is licensed under a Creative Commons Attribution 4.0 International License.