L’Institutu de Medicina Llegal investigó 175 casos durante 2025, frente a los 67 contabilizaos en 2020. La mayor parte de les víctimes son muyeres d’ente 18 y 30 años, mientres los profesionales detecten tamién un aumentu de les denuncies que tienen como víctimes a menores varones.

Les cifres de violencia sexual que lleguen al Institutu de Medicina Llegal y Ciencies Forenses d’Asturies siguen una evolución ascendente. En 2025 realizáronse 175 periciales venceyaes a agresiones sexuales, frente a les 67 de 2020. Son 108 casos más en cinco años, una medría superior al 160% y la cifra más alta del periodu analizado.

El perfil mayoritariu de les víctimes sigue siendo’l de muyeres d’ente 18 y 30 años, pero los datos del pasáu exerciciu inclúin tamién ocho varones: seis menores d’edá y dos homes d’ente 31 y 45 años. La directora del Institutu, Antonia Martínez, llamó especialmente l’atención sobre l’aumentu de casos que tienen como víctimes a neños y adolescentes varones.

Nel casu de los menores, otru elementu especialmente preocupante ye la proximidá del agresor. Según los datos espublizaos, les agresiones proceden de manera predominante del entornu cercanu de la víctima: familiares, vecinos o persones conocíes. Esto desmonta la imaxe simplista del agresor desconocíu y sitúa una parte importante del problema precisamente nos espacios nos que los menores tendríen de sentir mayor seguridá.

De les 175 periciales realizaes, en 65 nun foi posible recoyer muestres porque los fechos nun yeren recientes. El datu evidencia tamién una de les dificultaes avezaes na investigación d’estos delitos: el tiempu que pue pasar ente l’agresión y la denuncia o la llegada a los servicios forenses.

El propiu Institutu de Medicina Llegal advierte, amás, de que les estadístiques namás espeyen los casos que lleguen a denunciase y ser investigaos, polo que la dimensión real de la violencia sexual ye necesariamente mayor. Esa mesma distancia ente la violencia sufrida y la que finalmente llega al sistema institucional yá apaecía cuando 2.709 asturianes denunciaron violencia de xéneru nel añu 2024.

Los nuevos datos forenses encaxen, amás, con otru indicador esmolecedor. Según les estadístiques de sentencies firmes analizaes esti branu, el 98% de les persones condergaes por delitos sexuales n’Asturies son homes. En 2025 hubo 95 persones condergaes por esta clase d’infracciones y les sentencies acreditaron 105 delitos sexuales. Son datos distintos —unes cifres miden investigaciones forenses y otres, condergues—, pero les dos series apunten a una mesma realidá: la violencia sexual continúa teniendo una dimensión pergrande, xorreciente y nidiamente marcada pol xéneru.

La respuesta institucional tampoco pue reducise al momentu posterior a l’agresión. Les organizaciones feministes vienen reclamando prevención, educación afectivosexual, atención especializada y recursos públicos estables, como vienen recordando les movilizaciones periódiques contra les violencies machistes n’Asturies.

La medría de les periciales nun permite afirmar automáticamente que les agresiones reales aumentaren exactamente na mesma proporción: tamién pue influyir una mayor concienciación, identificación de conductes delictives y disposición de les víctimes a denunciar. Pero tampoco permite restar importancia al datu. Pasar de 67 a 175 casos atendíos pol Institutu de Medicina Llegal en cinco años ye una señal d’alarma que reclama prevención, recursos y una respuesta pública sostenida.

This work is licensed under a Creative Commons Attribution 4.0 International License.