El Aeropuertu d’Asturies va recibir 50,3 millones d’euros d’inversión ente 2027 y 2031. El Conseyu de Ministros aprobó esti martes el nuevu Documentu de Regulación Aeroportuaria (DORA), que contempla actuaciones sobre la pista y la terminal nun momentu nel que l’aeropuertu bate récords de viaxeros, pero sigue teniendo pendiente afitar el so crecimientu internacional.

Les actuaciones previstes inclúin el recrecíu de la pista, l’ampliación de la sala d’embarque internacional, la renovación de pasareles, un nuevu valláu y equipamientu de seguridá pa los filtros. La inversión forma parte de los cerca de 13.000 millones que Aena va movilizar na rede aeroportuaria estatal hasta 2031.

Los fondos nun salen directamente de los Presupuestos Xenerales del Estáu. El DORA financia les inversiones colos ingresos del propiu sistema aeroportuariu xestionáu por Aena, fundamentalmente tases y actividá comercial. Pal conxuntu de la rede, el Gobiernu estatal prevé una medría media de les tarifes aeroportuaries d’un 0,33% añal.

L’anunciu coincide con unes cifres de tráficu particularmente altes. En agostu utilizaron l’Aeropuertu d’Asturies 239.142 persones, un 16,3% más que nel mesmu mes de 2025 y el mayor rexistru mensual algamáu hasta agora. Ente xineru y agostu pasaron pela terminal 1.513.213 viaxeros, un 10,5% más que nel mesmu periodu del añu anterior.

Pero detrás del récord hai dos evoluciones bien distintes. El tráficu comercial nacional acumuláu creció un 17,4%, hasta los 1.237.623 viaxeros. L’internacional, sicasí, cayó un 12,5%, con 272.467 pasaxeros. Namái n’agostu los desplazamientos internacionales baxaron un 12,6% frente al mesmu mes de 2025.

La diferencia ye relevante precisamente porque una de les actuaciones anunciaes ye ampliar la sala d’embarque internacional. La infraestructura gana capacidá, pero convertir esa capacidá en conectividá estable depende de disponer de rutes internacionales capaces de consolidase más allá d’una temporada concreta.

En 2025 l’aeropuertu superara por primer vegada los dos millones de pasaxeros nun añu. El crecimientu posterior confirma que la terminal precisa inversiones, pero obliga tamién a preguntase qué movilidá se quier construyir. El debate tien especial importancia nun país nel que les instituciones vienen presentando’l turismu como un motor económicu cada vegada más central, una orientación cuestionada al analizar el pasu d’una economía industrial a un modelu cada vegada más dependiente del turismu.

Una infraestructura aeroportuaria moderna ye útil pa la población asturiana, les empreses, la diáspora, la universidá o les rellaciones económiques esteriores. Nun tendría de midise solamente pola cantidá de visitantes que pueda traer. La mesma discusión apaez nel tresporte terrestre cuando los refuercios de movilidá concéntrense nos meses y espacios de mayor demanda turística mientres munches necesidaes cotidianes siguen pendientes.

Más viaxeros impliquen tamién más actividá económica, pero nun son un indicador suficiente pa medir el beneficiu social. La medría continuada del turismu abrió yá l’alderique sobre quién paga los costes adicionales que xenera, una cuestión presente na discusión sobre la ecotasa y el destín de los ingresos derivaos de la presión turística.

Esa presión tampoco se reparte igual per tol territoriu. Avilés, la gran ciudá más próxima al aeropuertu, lleva años viendo medrar el pesu del agospiu turísticu y la conversión de vivienda residencial n’apartamentos turísticos. La conectividá ye necesaria, pero les sos consecuencies dependen del modelu económicu y territorial nel que s’integre.

De fechu, el cuestionamientu de la masificación llevó esti branu a recuperar con fuercia’l plantegamientu de que Asturies tien que siguir siendo primero un país pa vivir y non un productu turísticu. La modernización del aeropuertu nun contradiz necesariamente esi plantegamientu: disponer de bones comunicaciones ye una necesidá d’un país modernu. La cuestión ye pa quién y pa qué se diseñen.

Los 50,3 millones permiten afrontar inversiones que la infraestructura precisa. Agora queda una segunda cuestión, menos espectacular que la cifra pero igual d’importante: conseguir que la medría de pasaxeros se traduzca en meyor conectividá pa la población y la economía asturiana, especialmente cola estaya internacional, que ye precisamente la que ta perdiendo viaxeros en 2026.

This work is licensed under a Creative Commons Attribution 4.0 International License.