La formación soberanista entra na cabera fase de la so campaña escontra la masificación turística poniendo a disposición de la ciudadanía 300 camisetes col llema «Turistes: Asturies nun ta en venta». Van distribuyise a 5 euros, estrictamente a preciu de coste, y puen encargase nel corréu andechainfo@gmail.com.
Andecha Astur quier que la campaña escontra la masificación turística salga definitivamente de los cartelos y les redes sociales pa facese visible nes cais. La organización vien d’editar 300 camisetes cola imaxe de la campaña y el mensaxe «Turistes: Asturies nun ta en venta», acompañáu pola reivindicación d’un «turismu caltenible, respetuosu col mediu ambiente y la identidá asturiana». Les camisetes van ponese a disposición de quien quiera participar na campaña por 5 euros, a preciu de coste y ensin finalidá comercial.
La iniciativa forma parte d’una campaña muncho más amplia. Andecha Astur vien defendiendo que’l problema nun ye la esistencia del turismu como actividá económica, sinón un modelu basáu nel aumentu constante de visitantes, na precariedá llaboral y na conversión del territoriu nun productu de consumu. La formación rellaciona esta dinámica cola presión sobre la vivienda, la proliferación d’agospios turísticos, la saturación de carreteres y espacios naturales y la dependencia d’un sector marcáu pola estacionalidá. Esta posición yá llevó a la organización a impulsar campañes específiques contra la xentrificación, como la desarrollada en Cimavilla escontra la masificación turística.
El lema tampoco ye nuevu. «Asturies nun ta en venta» forma parte de les campañes d’Andecha dende los años noventa y tuvo ente les sos revindicaciones la necesidá de poner llendes al crecimientu turísticu y facer que’l sector contribuya a los gastos que xenera. Esa reclamación acabó concretándose nuna propuesta de Llei de Turismu Caltenible, con midíes como una ecotasa, la regulación de les viviendes turístiques, la posibilidá de declarar fasteres saturaes y la protección de los espacios naturales. InfoAsturies repasó esti percorríu al analizar la reciente puesta en marcha de la tasa turística en «Los asturianos aplauden la ecotasa pero quieren saber aú van dir a parar los ingresos xeneraos», ente que la propuesta completa puede consultase na web d’Andecha Astur.
Ún de los puntos nos que más carga la cabera fase de la campaña ye contra la utilización d’Asturies como supuestu «refuxu climáticu». Andecha acusa al Gobiernu asturianu de convertir el cambéu climáticu nun reclamu turísticu y recuerda que’l país tampoco ta al marxe del aumentu de temperatures, les seques, los incendios forestales o los cambios nos ciclos naturales. El mesmu plantegamientu yá foi analizáu n’InfoAsturies en «La babayada del “refuxu climáticu”»: tener temperatures más baxes qu’otros territorios nun convierte Asturies nun espaciu inmune a la crisis climática nin xustifica utilizar esa crisis como ferramienta publicitaria.
La presión turística tien amás una traducción cada vegada más visible nel mercáu residencial. En conceyos como Villaviciosa, más del 40% del parque de vivienda corresponde a segundes residencies o cases que permanecen vacíes bona parte del añu, al tiempu que crez la presencia de viviendes vacacionales y la demanda de compradores de fuera: «Media Villaviciosa vacía poles segundes residencies y viviendes vacacionales». P’Andecha, ye precisamente esti tipu de procesos el que demuestra que la vivienda nun puede subordinase a la rentabilidá turística nin dificultar que la población asturiana pueda siguir viviendo nos sos pueblos y barrios.
La crítica va tamién contra la conversión progresiva del turismu nun sustitutu d’otros sectores productivos tornando Asturies «De potencia industrial a reserva turística» col riesgu d’un modelu nel que’l paisaxe y la cultura se conviertan en mercancía al empar que pierden pesu actividaes capaces de xenerar emplegu estable. Otra campaña cuestionada por Andecha foi la subvención pública del Bonu de Turismu Rural, recoyida en «Asturies nun se vende: regálase», pola contradicción que la formación ve ente denunciar la saturación y siguir financiando polítiques destinaes a aumentar la demanda turística.
La propuesta que defende Andecha nun pasa por desaniciar el turismu, sinón por subordinarlu a les capacidaes y necesidaes reales del país: protección de la vivienda y de los espacios naturales, defensa de los servicios públicos, condiciones llaborales dignes y promoción de la cultura, la llingua y los productos asturianos. La organización resume esta concepción nuna idea: Asturies ye un país pa vivir, non un parque temáticu. Agora, con 300 camisetes circulando poles cais, pretende que’l mensaxe de la campaña seya tamién una revindicación visible y cotidiana.
This work is licensed under a Creative Commons Attribution 4.0 International License.
