La plataforma refuga que la so protesta na Campa Gües punxera en peligru a les persones que participaben nel homenaxe del Pozu Funeres como denuncia’l presidente y acúsalu d’intentar treslladar l’alderique a una cuestión de seguridá cuando siguen ensin respuesta les denuncies sobre trabayos venceyaos al permisu mineru, accesu a Montes d’Utilidá Pública y falta d’autorizaciones

VIDEU DEL MOMENTU EN QUE BARBÓN REFUGA RESPONDER

La espirica alrodiu del permisu d’investigación minera Astur A sumó un nuevu episodiu tres l’actu de conmemoración de les víctimes del Pozu Funeres . La Plataforma Salvemos Peñamayor respondió con dureza a Adrián Barbón dempués de que’l presidente del Gobiernu asturianu acusare a los activistes de poner en riesgu la seguridá de les persones asistentes pola situación creada nel accesu a la Campa Gües. Salvemos Peñamayor niega esa versión y acusa al presidente de «mentira y demagoxa» pa evitar responder sobre la tramitación del proyectu mineru.

La concentración nun yera una novedá. La plataforma lleva tres años aprovechando la celebración del homenaxe pa facer visible la oposición al proyectu d’Asturmet. Yá en 2025 Salvemos Peñamayor denunció na mesma Campa Gües que’l permisu Astur A tenía de tar caducáu y recordó que’l propiu plan d’investigación contempla actuaciones nesta contorna.

Nesta ocasión, según esplica’l colectivu, participaron alredor d’una decena de persones, que permanecieron a la entrada de la Campa Gües y a más d’un kilómetru del Pozu Funeres, ensin interferir nel homenaxe. La plataforma sostién amás que los sos vehículos taben aparcaos nos márxenes y que la acumulación de coches producióse cola llegada prácticamente simultánea de participantes nel actu de la FSA. Asegura igualmente que la Guardia Civil nun identificó a nengún integrante del colectivu nin consta hasta agora sanción dalguna contra los sos vehículos.

Pero Salvemos Peñamayor considera que la discusión sobre’l tráficu ta ocultando la cuestión principal. El colectivu asegura tener presentaes denuncies ante les conseyeríes d’Industria y Mediu Rural y ante los conceyos afectaos pola realización de recoyida de muestres en Montes d’Utilidá Pública ensin que consten los correspondientes títulos d’accesu y ocupación.

Según la plataforma, la propia Asturmet habría reconocío na documentación remitida a Industria que nun dispón d’esos acuerdos. A ello suma l’ausencia, asegura, d’autorizaciones municipales y la incompatibilidá de determinaos trabayos coles normes urbanístiques de conceyos afectaos. Son cuestiones que la organización yá vien denunciando dende hai meses: n’abril alertaba de falta de tresparencia, desconocimientu de los trabayos y problemes d’accesu a la documentación del espediente.

La plataforma entiende qu’estes circunstancies tendríen de frenar l’aprobación del Plan de Labores II y reforciar l’apertura d’un espediente de caducidá. La cuestión nun ye menor: el permisu Astur A, concedíu en 2024 a Asturmet Recursos SLU, comprende 217 cuadrícules mineres nos conceyos de Bimenes, Llaviana, Nava y Piloña.

La oposición institucional al proyectu tampoco ye nueva. En payares de 2024 la Xunta Xeneral aprobó una resolución reclamando la revocación del permisu d’investigación minera. La existencia de la Resolución 79/XII, aprobada’l 13 de payares, consta na documentación oficial del parlamentu asturianu, que siguió controlando posteriormente’l so cumplimientu.

La presión social tampoco menguó. En febreru d’esti añu 3.321 firmes llegaron a la Dirección Xeneral de Mines reclamando que se tenga en cuenta’l refugu vecinal, y en mayu vecinos de los cuatro conceyos volvieron movilizase cola II Simultánea de Cumes en defensa de Peñamayor.

Salvemos Peñamayor incide amás nuna contradicción que considera especialmente grave: el proyectu contempla trabayos d’investigación na propia contorna de la Campa Gües, un espaciu estrechamente venceyáu al Pozu Funeres, onde se recuerda cada añu a les 22 persones asesinaes pola represión franquista en 1948. La plataforma reclama que tanto esti llugar como otros posibles enterramientos de la zona reciban la protección prevista pola normativa de memoria democrática.

Por ello, el colectivu reclama al Gobiernu una respuesta concreta: con qué autorizaciones se fixeron los trabayos en terrenos públicos, qué comprobaciones realizó la Dirección Xeneral de Mines y por qué sigue avanzando la tramitación si nun consten tolos permisos que, según la plataforma, son necesarios.

«L’abusu d’autoridá, la demagoxa, la opacidá y la falta de respetu a la normativa vixente nun son síntomes d’un bon funcionamientu de la democracia», conclúi Salvemos Peñamayor, que anuncia que va siguir movilizándose pacíficamente y esixendo la caducidá d’Astur A.

This work is licensed under a Creative Commons Attribution 4.0 International License.