Mariano Suárez “Los que mos sintimos asturianos y d’esquierdes somos mayoría nel país”

  • 1 Payares, 2022

“Valoramos positivamente’l protagonismu de la nuesa propuesta de mayu nel panorama políticu asturianu.

Un frente común, asturianu y d’esquierdes, ye imprescindible pal futuru d’Asturies”.

 

Entrevistamos a Mariano Suárez, miembru de la Xunta Executiva d’Andecha Astur.

 

¿Recuerda’l documentu que presentó Andecha Astur en mayu d’esti añu?

Sí, sí, téngolo bien claro. Coincidió cola cellebración del 25 mayu, una xorná d’homenax a la identidá hestórica y a la voluntá política d’Asturies. Esi díi presentemos un documentu, voluntariamente breve, pero importante, analizando la situación sociopolítica d’Asturies y proponiendo un frente común, asturianu y d’esquierdes, pa trabayar pol futuru’l nuesu país.

Esa propuesta tornemos repitila cuandu, pa vindicar el 8 setiembre, ficimos una concentración n’Uviéu, col llema “Otra Asturies ye posible”. D’esa xorná vindicación, fecha a comuña cola CSI, Mocedá Comunista, JCE m-l, FAMYR y Asamblea Republicana d’Uviéu, destaco la importancia del testu lleíu por consensu, que yera un llamáu a la xuntanza y a la xunidá d’aición de la xente que se siente asturiano y d’esquierdes, que ye mayoría nel nuesu país.

 

IU, Podemos… Cola prosimidá de les elleiciones n’Asturies, paez que se punxo de moda’l conceutu de “frente común, asturianu y d’esquierdes” que presentastis hai meses. ¿Por qué esti fervedoriu de mensaxes nesi sen?

Ye cierto, tiempu dempués de la presentación de la nuesa propuesta sintióse falar d’esos conceutos dende otres muerganizaciones polítiques. Analizándolo con posu, resulta normal. Tamos énte una propuesta que nun se pue inorar, que nun se pue ñegar ensin que quede n’evidencia la falta razones pa esa ñegación. Yá lo diximos en mayu: la situación d’Asturies ye insostenible, tan insostenible que naide pue dicir que non a un frente común pa defender el nuesu futuru comu pueblu y comu trabayaores.

Per otru llau, queremos que se fale d’esta idega del frente común, porque pa facela rialidá toes y toos tenemos que falar, fondo y posao, d’ella. Tienen de falar partíos, sindicatos, asociaciones ciudadanes… Pero tamién tienen de falar d’ello les presones, les presones políticamente motivaes y, sobro too, tamién la gran cantidá d’asturianes y asturianos que, emburriaos pola casta`l sistema, foron perdiendo enfotu na so participación en soluciones polítiques pa la so economía llariega, pal so drechu al trabayu, pa la so condición d’usuarios de sirvicios públicos, pa la reconocencia de la so llingua ya identidá, pa la so dependencia…

 

Por dir casu por casu,¿cómu valoráis la propuesta d’Izquierda Unida?

IU esperó a ochobre, mediu añu, pa entamar a falar de “una allianza amplia y plural” pa les elleiciones n’Asturies, con unes declaraciones públiques escesivamente centraes nos réditos elleutorales que quier algamar. El nuesu enfoque ye más ampliu entá. N’Andecha Astur falamos de la necesidá d’articular una ferramienta plural d’aición popular que permita presentar y defender proyeutos de futuru, plantegar alternatives al sistema, denunciar situaciones concretes, ufrir rempuestes colleutives na cai cuandu seya mester, discriminar con claridá ente los responsables y les víctimes de la precarización social y de la falta democracia, ameyorar la concenxa xeneral sobro la rialidá d’Asturies… El problema principal nun ye precisamente’l que más-y esmolez a IU, los sos resultaos elleutorales; el principal retu ye costruyir a comuña un preséu de defensa d’Asturies, de los nuesos drechos presonales y colleutivos, del nuesu futuru nesta tierra, del futuru de los que tuvieron de colar, del futuru de los que viven equí pero na precariedá… Y l’esfuerciu cimeru tien de ser pa convertir esa propuesta nun preséu útil pa la llucha sociopolítico, un preséu que pue llegar a tener espresión en forma d’un frente común tamién elleutoral; pero lo primero, ye lo primero.

 

¿Queréis dicir que’l mensax d’Izquierda Unida ye poco creyible?

Non, non. Lo que dicimos ye qu’igual IU presentó la so propuesta zarrando muncho’l diafragma’l so oxetivu. Pero n’Andecha Astur creyemos que nun se tien de valorar eses coses. Tol mundiu conoz la trayeutoria d’IU y el so entornu, el so posicionamientu col PSOE y colos sos presupuestos, la so vieya trayeutoria comu sucursal d’un partíu estatal, el so tacticismu en materia d’oficialidá o identidá asturiana… Pero nun son éstos tiempos pa dar importancia a les diferiencies, pa guetar culpables.

Lo único qu’esperamos d’IU ye que tenga’l suficiente puxu democráticu pa sentase nuna mesa plural y falar de la propuesta de frente común. Si IU ye capaz de comprometese nuna plataforma que decide n’Asturies lo que se quier p’Asturies, que nun ye sucursal de nengún referente madrilanu, y que defende un programa mínimu de propuestes d’esquierdes, tol mundiu debería acoyer a IU comu compañeru de viax y sociu nesa llucha por esa otra Asturies que ye posible.

 

Y ¿cómu valoráis les pallabres de Daniel Ripa, Xune Elipe y otros cuasi yá espulsaos de Podemos?

Lo primero que tenemos de dicir dende Andecha Astur ye que la situación d’eses presones depende d’un procesu internu, entá abiertu, n’otra muerganización política. Y nestes situaciones siempres queremos caltener un respetu escrupulosu a los procesos internos d’otros grupos.

Dientru d’esi respetu, somos xente qu’atiende los medios de comunicación y que fala con tol mundiu. Ye evidente, percíbese un procesu de purga dientru Podemos. Nun mos compete entrar a valoralo, sólo costatamos el fechu, comu lo fae tol mundiu. Y pronto se sabrá cómu acaba. Si fina con un alcuerdu internu que permite’l retornu a la participación en Podemos de los espulsaos y los espedientaos, nun sedríen previsibles cambeos d’importancia na trayeutoria política d’esa muerganización. Si fina colos espedientaos y espulsaos fora la formación podemita, el futuru nun ye predecible. Pero yo sí esperaría qu’eses presones, magar el tragu amargu d’una espulsión y los respigos xelaos que da la cayía na cai dende les istituciones, caltuvieren el puxu necesariu pa nun arrenunciar a la so actividá política. Porque güei’l futuru d’Asturies necesita xuncir toles manes posibles.

Dicho esto, sí vemos que   fasta’l seutor de Podemos más oficialista y dependiente de Madrid utiliza na prensa la idega de “frente ampliu” comu elementu dinamizaor aglutinante, por contradictorio que resulte cola so práutica política.

Y, por supuesto, tamién mos dimos cuenta de cómu Dani Ripa, dende xunetu y vinculao a situaciones propies del procesu internu de Podemos, yá faló de “frente ampliu asturianu y d’esquierda” nuna entrevista prensa y en varios comentarios nes redes sociales, un frente dixo que “desbordare” mesmamente a Podemos. Y ésta ye precisamente la propuesta que presentemos yá’n mayu: xenerar les sinerxes necesaries pa entamar un proyeutu de collaboración que “desborde” les formaciones polítiques d’anguañu, calteniendo la so esistencia orgánico y la so capacidá político, pero apautándose voluntariamente nun frente asturianu ampliu, con tolo qu’ello supón d’esfuerciu, negociación y consensu.

 

¿Pero Podemos nun ye parte del sistema que determinó’l status quo d’Asturies?

Cuandu la xente d’esquierdes que nun combaya col sistema, qu’apuesta por combatilu, analiza les rellaciones de Podemos col PSOE nel ámbetu estatal y nel asturianu, sí, decátase de que cuandu nun tienen compromisos de gobiernu tienen sofitos estratéxicos relevantes y, siempres, una sucursalidá territorial (Madrid decide n’Asturies). Y eso débese a que Podemos, tres ñacer, destapó que tenía oxetivos y estratexes dixebraos de los qu’anunciare nel so entamu. Esa operación de trafullu foi la que desactivó’l puxu políticu acumulao por importantes seutores populares, la que llevó d’arranar l’asaltu los cielos a una doliosa inanición social y política. Echamos de menos esti analís autocríticu nel artículu espublizáu apocayá por Xune Elipe Raposo, porque llimítase sólo a desplicar en qué pudieron fallar dalgunes esperiencies anteriores a Podemos, asina comu a emponderar inecesariamente custiones que nestos momentos separten más que xunen (marcu estatutariu, gallegu n’Asturies…).

Sicasí, siempres hai qu’enfotase na posibilidá de poder entamar un tiempu nueu. Son too hipótesis, pero tamos obligaos a tar sollertes ya interpretar les señes de los tiempos. Si una parte de Podemos (la más averá al PSOE y la más defensora del sucursalismu políticu d’Asturies con respeutu a Madrid) espulsa a otra parte de Podemos (la que nun quier ser pigarra de Barbón y la FSA y la que pue llegar aceutar Asturies comu marcu de determín políticu), esti seutor espulsáu, si se resiste a desactivase, podría aidar a conformar esi frente común, asturianu y d’esquierdes, que proponemos.

Tornamos dicir que más importante que’l papel que caún xugó nel pasáu, lo único qu’importa daveres ye’l papel que ta dimpuestu a desempeñar nel futuru. Y si aporta daqué al esfuerciu descomanáu que tenemos de facer a comuña, bienllegá seya cualisquier presona, cualisquier grupu.

 

Viendo’l marabayu reaciones que surdieron tres la propuesta d’Andecha Astur, ¿podéis resituar la vuesa idega nesti contestu?

Nun mos paez que seya mester resituar o redefinir la nuesa propuesta de mayu. La propuesta ye cenciella y clara. Les compañeres y compañeros d’Andecha Astur ficieron bien en presentar la so propuesta con tanta anticipación; ello posibilitó qu’agora haiga posicionamientos diversos y estremaos sobro la idega base d’una xuntanza política, porque esta propuesta qu’echamos andar ufre a la sociedá asturiana una alternativa creyible y viable.

Nun hai que resituar o redefinir la propuesta. Sólo hai qu’espardela y repasar con claridá’l camín que señala: trabayar pa la xuntanza de toles esquierdes qu’asumen que les asturianes y asturianos tienen que decidir equí’l so futuru. Axuntar, decidir, trabayar, tresformar… éstos son los verbos qu’interesa conxugar anguañu. Tol esfuerciu d’Andecha Astur ta agora empobináu a ello.

 

Redaición InfoAsturies

This work is licensed under a Creative Commons Attribution 4.0 International License.

1 Comment Already

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies