El PSOE presenta les primaries como una de les sos grandes credenciales democrátiques, pero los conflictos de Xixón amuesen que nin ente ellos mesmos son quien a respetar la democracia y competir en condiciones d’igualdá.

El furrulamientu mafiosu del PSOE ta tan ensiertáu nel aparatu del partíu que l’alderique nes primaries xixoneses ciéntrase agora en si ye llícito poner medios y sofitos por parte de la dirección del partíu pa señalar una candidata concreta perriba’l restu, anantes de permitir votar a los sos afiliaos.

Carmen Moreno abandona les primaries del PSOE de Xixón denunciando un procesu ensin neutralidá. La exxerente de la Unión de Comerciantes acusa a la dirección socialista d’usar medios y cargos del partíu pa favorecer a Lara Martínez. Nun ye la primer vegada: en 2018 y 2022 les primaries xixoneses yá tuvieron marcaes poles acusaciones d’intervención del aparatu y, paradóxicamente, dalgunos de los que güei defenden el procedimientu denunciaben entós esa mesma práctica.

Carmen Moreno decidió baxase de la carrera pola candidatura socialista a l’Alcaldía de Xixón enantes siquiera d’entamar la recoyida d’avales. La razón que da nun ye una discrepancia política cola so rival, sinón daqué bastante más grave tratándose d’unes primaries: considera que nun esiste un «terrenu de xuegu neutral» y que nun tán garantizaos los principios d’independencia, igualdá y respetu a la militancia.

Moreno acusa directamente a la dirección llocal d’utilizar medios del partíu na presentación y promoción de Lara Martínez, viceconseyera de Turismu y, al empar, portavoz de la propia Executiva socialista xixonesa. Tamién denuncia la intervención de cargos de la dirección na busca de sofitos pa Martínez, una actuación que califica d’«utilización ilexítima y ventaxista» de los recursos orgánicos.

El secretariu xeneral, Monchu García, nun niega’l posicionamientu de la so executiva a favor de Martínez. Tres conocese la retirada y los sos motivos, la so respuesta foi un llacónicu «Na que decir». 

Elli mesmu denunciaba eses práctiques cuando yera l’afectáu; Monchu García denunciaba en 2018 una «candidata del aparatu» cuestinando duramente’l procedimientu que convirtió a Ana González na candidata socialista a l’Alcaldía, tres ser señalada ensin disimulu la opción del «sector oficial». Aquella candidatura provocó un fuerte enfrentamientu internu y una de les voces que más claramente cuestionó’l procedimientu foi precisamente la de Monchu García

Cuatro años más tarde repitióse un escenariu extraordinariamente asemeyáu. La dirección xixonesa apostó por Luis Manuel Flórez, ‘Floro’, independiente y non afiliáu al PSOE, pa sustituyir a Ana González. La militante Ana Puerto presentó candidatura alternativa y resumió’l so malestar nuna frase que podría pronunciase güei ensin cambiar prácticamente una pallabra: «La Executiva presentó un candidatu de parte y rompió’l procesu».

A más altu nivel, en 2017, nes primaries de la propia FSA, la cuestión de la neutralidá yá prevocara enfrentamientos: la candidatura de José María Pérez reprochó’l sofitu explícitu d’Adriana Lastra a Adrián Barbón. 

Repítese asina el patrón de convocar primaries “pa que decida la militancia” mientres la dirección que les organiza sofita y señala previamente cuál ye la so opción preferida y pon la estructura orgánica y medios al so favor, xenerando una desigualdá que pon en dubia la democracia del procesu. 

This work is licensed under a Creative Commons Attribution 4.0 International License.