La Cofradía de Pescadores Santa Ana de Llanes cellebra con cava el  recibir el Premiu al “Pueblo Ejemplar” d’Asturies 2026, demostrando que’l so provincianismu llega más allá de facer reverencies al rei d’España

La Cofradía de Pescadores Santa Ana de Llanes foi escoyida ente trenta candidatures que, nun exerciciu de pleitesía y sumisión al reináu, de presentaron a ser escoyíos como Pueblu Exemplar d’Asturies 2026 y recibir la “honrosa” visita de la familia real española.

El calter monárquicu del premiu nun ye una interpretación nin una acusación: ta na so propia concepción. Esti galardón nun nació simplemente pa reconocer pueblos que curien el patrimoniu, practiquen la solidaridá o caltengan formes comunales de vida. Nació en 1990, coincidiendo col décimu aniversariu de la Fundación Principe de Asturias, dientro d’una institución que tien como razón de ser institucional reforzar el venceyu d’Asturies cola monarquía española, una necesidá por ciertu ñacía del desafeutu que tradicionalmente sintieron los asturianos por esta institución. Un desafeutu que, al paecer, iguase con perres (40.000 míseros euros de premiu) y visibilidá mediática. El premiáu recibe perres; la monarquía recibe una xornada completa de llexitimación social.

El xuráu valoró “la so defensa de la pesca artesanal, la caltenibilidá, la solidaridá y la conservación y espardimientu de la cultura marinera”; marinera, nun sabemos, pero la cultura asturiana nun ye lo que defenden, quedó claro en dos coses: l’usu del español en tol procesu ya’l brindis con cava, que ya llevantó angüeñes nel sector sidreru.

Asturies tien una bebida propia que nun ye namás un productu agroalimentariu. La UNESCO reconoció en 2024 la Cultura Asturiana de la Sidre como Padremuñu Cultural Inmaterial de la Humanidá, destacando precisamente’l so papel como símbolu d’identidá, elementu de cohesión social y espresión de la rellación ente les comunidaes, el paisaxe y les formes propies de socialización.

La sidre ye, amás, la bebida de cellebración por escelencia de los asturianos. Entós, ¿por qué cuando llega’l momentu solemne apaez el cava?

La respuesta probablemente tien menos que ver col gustu que col cosmopaletismu y la xerarquía cultural que sigue instalada nel país: a la hora de rendir pleitesía, Cava, copa alta y ritual cortesanu.

Hai muncho de servilismu nesta escenificación del modelu institucional que lleven décades normalizando: la idega de que la máxima distinción que puede recibir una comunidá asturiana culmina cola visita d’una familia española a la que naide escoyó.

Y el cava del brindis encaxa perfectamente nesi cuadru. Quizá porque, nel fondu, el Pueblu Exemplar nunca tuvo como misión principal representar una Asturies consciente de sí mesma.