La poesía n’asturianu va sonar el 8 de setiembre nel Institutu Cervantes d’Atenes de la man d’Inaciu Galán. La cita griega ye l’últimu exemplu d’una presencia internacional cada vegada más visible del idioma: congresos europeos, universidaes, organismos internacionales y foros de defensa de les llingües minorizaes reconocen una realidá llingüística que, paradóxicamente, sigue ensin tener plena reconocencia nel país

El próximu 8 de setiembre, coincidiendo amás col Día d’Asturies, la poesía asturiana va escuchase na terraza del Institutu Cervantes d’Atenes, nel corazón del barriu de Kolonaki.

L’escritor, periodista y activista llingüísticu Inaciu Galán va participar nel Festival de Poesía del Mediterráneu xunto a Ledicia Costas, Mireia Calafell y Juan Carlos Abril, y los autores griegos Ifigenia Doumi y Stamatis Polenakis. La cita va celebrase a les 19:30 hores y la propia radiotelevisión pública griega ERT anuncia l’alcuentru como una xornada de diálogu ente creadores de les dos orielles del Mediterráneu.

Nun ye una presencia puramente testimonial. Galán va llevar a Atenes creación escrita orixinalmente n’asturianu, nuna llingua que va compartir espaciu con otres tradiciones lliteraries contemporánees ensin precisar de nenguna xustificación previa sobre la so esistencia, la so validez o la so capacidá pa producir cultura.

Tampoco ye un casu aislláu. La presencia del asturianu en foros internacionales lleva años medrando.

En 2024 el mesmu Inaciu Galán representó l’asturianu en Bruseles nel Europe’s National Minorities: Ways Forward for Minority Protection, una conferencia internacional d’espertos entamada pola Federal Union of European Nationalities. L’alcuentru aconceyó representantes de comunidaes llingüístiques europees pa estudiar les restricciones que carecen les llingües minorizaes y les posibles actuaciones de la Xunión Europea, los estaos y la ONU.

En febreru de 2026, l’asturianu-lleonés tuvo tamién presencia nun coloquiu internacional sobre llingües minorizaes celebráu en Camberra, cola participación de la Australian National University y representantes del Centru Européu de Llingües Modernes del Conseyu d’Europa.

Y la investigación académica sobre l’asturianu sigue ampliando llendes. Universidaes y investigadores d’Estaos Xuníos, Francia, Rumanía, Alemaña, Suiza, Austria, Polonia o Reino Xuníu participaron nos últimos años en congresos y proyectos venceyaos a los estudios asturianos.

Esti mesmu añu, amás, l’Academia de la Llingua Asturiana anunció que’l XLIV Congresu Internacional de Filoloxía y Cultura Asturianes va dedicar una xornada al pieslle de Patronymica Romanica, un gran proyeutu internacional de cuatro décades d’investigación sobre los nomes propios romances, nel que participaron la Universidá d’Uviéu y l’ALLA. 

Ún de los exemplos más claros tuvo llugar esti mesmu branu y, esta vegada, n’Asturies.

Del 24 al 26 de xunetu, Uviéu convirtióse nel centru européu de defensa de les llingües minorizaes cola celebración del XXVIII Congresu de l’Asociación pa les Llingües y Cultures Europees Menaciaes (ALCEM), baxo’l llema En avant pour nos langues!. El congresu aconceyó nel Muséu Arqueolóxicu d’Asturies representantes, investigadores y activistes de pueblos y cultures de toa Europa comprometíos cola supervivencia de les sos llingües.

Ellí, l’asturianu compartió espaciu de reflexón col bretón, l’occitanu, el corsu, el galés, l’irlandés, el gaélicu escocés, el sardu, l’aragonés o’l friulanu, pente otres llingües.

La cuestión nun ye menor. Asitiar l’asturianu nesi marcu significa reconocelu polo que ye: una llingua histórica europea sometida a un procesu de minorización y necesitada de polítiques efectives que garanticen la so tresmisión y los drechos de los sos falantes.

La proyección internacional llega inclusive a les principales instituciones polítiques internacionales.

La situación del asturianu llegó hai años a les Naciones Xuníes. Yá en 2019 s’ informaba de la intervención del Relator Especial de la ONU sobre cuestiones de minoríes y recordaba que la discriminación de los asturfalantes fuera llevada anteriormente ante Naciones Xuníes y el Parllamentu Européu.

Más recientemente, organizaciones asturianes participaron, al traviés de la European Language Equality Network, nel procesu d’Exame Periódicu Universal d’España, llevando de nuevu la situación de los drechos llingüísticos a la ONU.

Tamién el Conseyu d’Europa vien llamando repetidamente l’atención sobre la situación del idioma. El Comité d’Espertos de la Carta Europea de les Llingües Rexonales o Minoritaries señaló la necesidá d’avanzar nel reconocimientu del asturianu y llegó a incluyir ente les cuestiones que requieren actuación inmediata los pasos necesarios pal so reconocimientu como llingua oficial.

El contraste con Asturies resulta llamativu. Mientres la llingua propia del país llega a Atenes, Camberra, Bruseles y Naciones Xuníes, n’Asturies sigue ensin oficialidá y la normalidá del so usu continúa dependiendo demasiadas vegaes de la voluntá puntual d’una institución, una empresa o una persona.

Nos medios públicos. La escasa presencia del idioma na RTPA continúa siendo una anomalía denunciada repetidamente, especialmente difícil d’esplicar tratándose d’una radiotelevisión pública asturiana que tien ente les sos obligaciones la promoción de la cultura y de la llingua del país.

Inclusive les actuaciones que se presenten como avances evidencien esa contradicción. Va namás unos díes, el Gobiernu d’Asturies presentó’l sellu Alfaya pa promover l’usu del asturianu na empresa y l’Alministración. Pero les comunicaciones alministratives del propiu programa llegaron n’español. Una pequeña anécdota que resume bastante bien la distancia ente la política llingüística que se publicita y la que realmente se practica.

Y detrás de too ello sigue tando la cuestión principal: la oficialidá. Esti mesmu añu, la reivindicación volvió sacar miles de persones a la cai na Mani de les Lletres reclamando daqué tan elemental como poder estudiar, trabayar, dirixise a les instituciones y ser atendíu na llingua propia ensin discriminaciones nin torgues.

El 8 de setiembre, na capital griega, Inaciu Galán va lleer poesía n’asturianu delantre d’un públicu internacional. La so obra, tornada yá al inglés, castellanu, aragonés, catalán, náhuatl o griegu, va entrar nuna conversación lliteraria cola creación gallega, catalana, castellana y griega.

Esa normalidá internacional contrasta cada vegada con más fuerza cola situación dientro d’Asturies. Porque mientres fuera crez la reconocencia científica, cultural ya institucional del asturianu, equí sigue siendo necesario reclamar espacios que cualquier llingua plenamente reconocida tendría garantizaos.