L’Academia de la Llingua Asturiana entama una nueva edición del CIFCA, que va xuntar conferencies, presentaciones, conversaciones lliteraries y comunicaciones, con una xornada monográfica dedicada al pieslle d’un proyeutu internacional d’investigación nel que la ciencia asturiana tuvo un papel destacáu.

L’Academia de la Llingua Asturiana (ALLA) anunció la celebración del XLIV Congresu Internacional de Filoloxía y Cultura Asturianes (CIFCA), que va desendolcase los díes 3, 4 y 5 de payares del 2026.

Como ye vezu, el congresu va convertir Uviéu nun puntu de referencia pa la investigación filolóxica y cultural asturiana, con un programa que va combinar formatos estremaos como conferencies, presentaciones de llibros, conversaciones lliteraries y comunicaciones académiques.

La cita va tornar aconceyar investigadores, escritores, docentes y especialistes venceyaos al estudiu de la llingua asturiana y del so patrimoniu cultural, nun espaciu d’intercambiu y espardimientu científicu.

La edición va tener como elementu destacáu la xornada del xueves 5 de payares, que va tar dedicada monográficamente al pieslle del proyeutu internacional d’investigación «Patronymica Romanica» (PatRom).

Esti proyeutu, desendolcau durante cuatro décades, tuvo como oxetivu l’estudiu de los nomes propios d’orixe románicu y la so evolución histórica y llingüística. Nel so desarrollu participaron instituciones y investigadores de distintos territorios europeos, ente ellos la Universidá d’Uviéu y l’Academia de la Llingua Asturiana, que tuvieron un papel relevante nel trabayu científicu.

La participación asturiana nesti proyeutu internacional supunxo la incorporación de la realidá llingüística del país al estudiu comparáu de les llingües romániques, reforzando la presencia del asturianu nel campu de la investigación filolóxica europea.

El CIFCA ye una de les principales cites científiques dedicaes al conocimientu y análisis de la llingua, la lliteratura y la cultura asturianes. Al llargu de les sos ediciones, convirtióse nun espaciu de presentación de nuevos estudios, debates y aportaciones sobre’l pasáu, el presente y el futuru del patrimoniu llingüísticu asturianu.

L’ALLA va facer públicu próximamente’l programa completu d’actividaes, participantes y horarios del congresu.

This work is licensed under a Creative Commons Attribution 4.0 International License.