El Gobiernu d’Adrián Barbón presenta’l sellu Alfaya como una ferramienta pa normalizar l’asturianu na comunicación y na xestión empresarial. Sicasí, les comunicaciones alministratives recibíes nel propiu procedimientu tramítense n’español. Un exemplu especialmente gráficu de la distancia ente la política llingüística que se publicita y la que practica l’Alministración nel so día ente día.

Alfaya ye la marca asturiana d’usu llingüísticu creada pol Principáu pa reconocer a empreses, profesionales y autónomos que faigan usu del asturianu na so actividá. Vaiga per delantre que la utilidá d’esi sellu, que nun apareya dala ventaxa competitiva nin fiscal, ye la d’una pegadiella de carina sorriente de les que dan a los rapacinos en clas d’infantil; sicasí, son abondes les empreses que la tan solicitando, seique seya pa tener un reconocimientu oficial del so compromisu llingüísticu.

La iniciativa, regulada definitivamente por resolución de la Conseyería de Cultura, Política Llingüística y Deporte del 6 de marzu de 2026 y publicada nel BOPA’l 20 de marzu, pretende reconocer distintos graos de compromisu empresarial cola llingua d’Asturies.

Cuando’l Gobiernu presentó Alfaya esplicó que’l nivel intermediu del distintivu requería, ente otres coses, que les empreses fueren receptives al usu del asturianu en comunicaciones. El nivel d’escelencia contempla un compromisu entá mayor, incluyendo formación interna, webs billingües y campañes de promoción.

Precisamente aquello que tendría que caracterizar tamién a una Alministración que diz apostar pola normalización llingüística.

Sicasí, y equí ta la gracia, les comunicaciones alministratives recibíes nel procedimientu que motiva esta información lleguen  esclusivamente n’español.

La paradoxa ye difícil d’esplicar: el Principáu crea un distintivu pa valorar que les empreses seyan quien a comunicase n’asturianu, pero cuando’l propiu Principáu se comunica con una d’eses empreses, incluso nel marcu del sellu, utiliza l’español. 

La cuestión ye de congruencia política.

¿Cómo pue’l Gobiernu esixir o premiar nel sector priváu un comportamientu llingüísticu que la propia Alministración nun incorpora con normalidá?

Más tovía cuando falamos d’un espediente xestionáu precisamente dende l’ámbitu de la política y normalización llingüística. El Principáu diz-y al empresariáu: usen l’asturianu, contesten n’asturianu, intégrenlu na xestión y normalicen la so presencia y depués mánda-y la comunicación alministrativa n’español.

Una cosa ye lo que se publicita. Otra, lo que se fai y quiciabes, antes d’entregar los primeros distintivos Alfaya, el Gobiernu tendría d’entrugase qué nivel del so propiu sellu superaría la mesma Alministración del Principáu.

¿Ilóxico? Si. ¿Sosprendente? Non. La dicotomía pente imaxen y fechos ye quiciás lo que meyor define la era Barbón y esta nun diba ser la excepción. El casu Alfaya nun apaez aislláu.

InfoAsturies vien documentando otros exemplos d’esa distancia ente la normativa, los anuncios institucionales y la práctica efectiva del Principáu.

En 2025, por exemplu, InfoAsturies denunciaba que l’aplicación pública ConeCTA siguía ensin versión n’asturianu dos años dempués d’entamar a funcionar, magar los criterios de llinguaxe alministrativu del propiu Gobiernu indiquen que les aplicaciones y ferramientes informátiques institucionales tienen que procurar cuntar con versión n’asturianu.

En xunetu d’esti añu, InfoAsturies señalaba otra contradicción asemeyada cola toponimia: el Principáu aprobaba un nuevu decretu pa recuperar y fixar los nomes tradicionales al tiempu que la propia Alministración seguía ensin emplegar con normalidá parte de la toponimia oficial.

Y la mesma distancia ente declaraciones y práctica institucional apaez n’otros ámbitos. A primeros d’añu, InfoAsturies recoyía cómo los Presupuestos del Principáu volvíen ignorar la oficialidá de la llingua asturiana, pese a les reiteraes declaraciones polítiques sobre la protección y promoción del idioma.

Nun son episodios idénticos, pero sí dibuxen un patrón políticu reconocible: una diferencia persistente ente lo que se proclama en materia de normalización llingüística y lo que finalmente se convierte en práctica ordinaria de l’Alministración.

Y hai que dicilo otra vuelta, entantu nun tengamos  -pa entamar- oficialidá, el restu de midíes son parches valeros. 

This work is licensed under a Creative Commons Attribution 4.0 International License.