Dende una víctima de namás 20 díes hasta una muyer de 92 años. El recuentu que presidió ayeri la concentración contra les violencies machistes en Xixón vuelve poner nomes, edaes y vides detrás d’unes cifres que corren el riesgu de convertise en rutina. La representante d’Andecha Astur foi la encargada esti mes de lleer el comunicáu, nel que’l casu de Laura Cruz sirvió pa volver señalar los fallos d’un sistema que nun foi quien a protexela.

La Gota Llechi volvió ser ayeri, miércoles 26 d’agostu, puntu d’alcuentru de la denuncia contra les violencies machistes en Xixón. Como vien asocediendo’l caberu miércoles de cada mes, la convocatoria volvió sacar a la cai una realidá que nun dexa de sumar víctimes y que, precisamente pola repetición de les cifres, corre’l peligru de ser asumida como daqué inevitable.

La concentración forma parte de la movilización mensual promovida pola Plataforma Stop Violencies, una convocatoria que tien como ún de los sos elementos centrales mantener visible’l númberu de muyeres asesinaes y recordar los sos nomes.

Esti mes, la intervención corrió a cargu d’una representante d’Andecha Astur. El comunicáu entamó precisamente reconociendo la dificultá d’atopar pallabres nueves pa falar d’un problema denunciáu una y otra vegada ensin que les cifres dexen de medrar. La reflexón plantegada foi sencilla: si les víctimes compartieren cualquier otra característica que nun fuere’l fechu de ser muyeres, una acumulación asemeyada d’asesinatos provocaría una alarma social inmediata. Sicasí, cuando se fala de violencia machista, les cifres amenacen con pasar per delantre de la sociedá como si fueren inevitables.

Y les cifres son difíciles d’asumir. 65 víctimes no que va de 2026, con edaes que van dende los 20 díes hasta los 92 años. Un abanicu d’edá que destrúi cualquier intentu de presentar la violencia machista como un problema llendáu a un perfil concretu, una clas social o una etapa determinada de la vida.

Esti recuentu ye más ampliu que la estadística oficial española de violencia de xéneru, que contabiliza específicamente los asesinatos de muyeres cometíos por pareyes o expareyes. Les organizaciones feministes y rexistros especializados incorporen tamién otros feminicidios familiares, infantiles, non íntimos o por conexón, polo que les cifres nun son directamente comparables.

El comunicáu detúvose especialmente nel asesinatu que golpeó Asturies esti mes d’agostu: el de Laura Cruz, guardia civil de 50 años asesinada a tiros pola so expareya nel cuartel de Llanes el 5 d’agostu.

El so casu foi presentáu como una evidencia especialmente dolorosa de los furacos del sistema de protección. Laura conocía los mecanismos disponibles y utilizólos. Había denunciao al so agresor, esistieren antecedentes por violencia machista y una orde d’allonxamientu, y ella mesma dexara constancia del mieu que-y tenía. Un añu anantes del asesinatu volvió denunciar la situación.

La información conocida tres el crime confirmó que Laura llevaba años denunciando comportamientos violentos, coacciones y control por parte de la so expareya, que finalmente quebrantó la orde d’allonxamientu y asesinóla nel mesmu cuartel onde trabayaba.

“Laura denunció. Laura pidióla”, resume’l comunicáu al recordar que se-y pide a les muyeres que denuncien, que pidan ayuda y que conozan los recursos disponibles. Laura fixo too ello. Y nun foi abondo.

El casu vuelve asitiar nel centru una crítica que yá aparecía en concentraciones anteriores na Gota Llechi. En payares de 2023, cuando’l recuentu de Stop Violencies algamaba les 97 víctimes, la representante d’Andecha Astur Carme Pérez resumíalo nuna frase: “el sistema falla”. Cuasi trés años dempués, la denuncia volvió repetise.

Sicasí, el comunicáu d’ayeri quixo evitar que tola atención quedara centrada nel asesinatu de Llanes. Los feminicidios son la consecuencia más estremada y visible d’un problema muncho más ampliu.

“Los asesinatos son solo la pica visible d’un iceberg enorme”, señaló’l testu, recordando les miles de situaciones de violencia física, sicolóxica, sexual, económica, llaboral o de control que nun terminen necesariamente nun titular de prensa y que munches veces nin siquiera lleguen a ser conocíes.

Esa mesma visión vien marcando les concentraciones mensuales de la Gota Llechi. En febreru de 2025, la intervención d’Amamantar ponía’l focu na educación y na reproducción dende la infancia de modelos machistes y relaciones de desigualdá; y n’abril del mesmu añu la convocatoria recordaba que la violencia contra les muyeres nun ye solamente física, sinón tamién sicolóxica, económica, sexual o llaboral.

Por eso, detrás del númberu 65 hai muncho más qu’una estadística. Hai nomes, families, edaes, histories y tamién munches otres muyeres que viven situaciones de violencia que nunca van formar parte d’esi marcador.

El comunicáu lleíu ayeri na Gota Llechi acabó con una idea que resume’l sentíu de que, mes tres mes, estes concentraciones sigan siendo necesaries: el feminismu nun ye una cuestión superada, sinón una necesidá democrática y la defensa del drechu de les muyeres a vivir ensin violencia y ensin mieu.

Porque, como conclúi’l testu, “vivir con mieu nun ye normal”.

This work is licensed under a Creative Commons Attribution 4.0 International License.