Les dificultaes pa cubrir les plantiyes de residencies y otros servicios sociosanitarios ponen el focu sobre les baxes llaborales; pero llendar l’analís al absentismu dexa fuera la pregunta fundamental: ¿por qué enfermen tantos profesionales d’un sector marcáu polos sobreesfuerzos físicos, la falta de personal, los turnos doblaos y una elevada carga emocional?

Les baxes llaborales prevoquen dificultaes evidentes a les empreses sociosanitaries. Cuando una persona entra en situación d’incapacidá temporal hai que reorganizar turnos, buscar sustituciones y garantizar que l’atención a los residentes siga furrulando, pero l’alderique nun pue quedar namái en cómo controlar o cubrir estes ausencies y non nes razones poles que se producen.

Les persones trabayadores tienen llendes físiques y emocionales. Y cuando estes se sobrepasen de forma continuada, el deterioru de la salú dexa de ser una circunstancia escepcional pa convertise nun riesgu inherente a les condiciones nes que se desendolca’l trabayu.

La cuestión cobra especial relevancia nun país avieyáu y con una necesidá xorreciente de servicios asistenciales.  N’Asturies hai menos de seis places residenciales por cada cien persones mayores y la demanda de curiaos tien dir acompangada de personal y medios abondos.

El trabayu nuna residencia implica atender a persones que, en munchos casos, presenten niveles elevados de dependencia. Llevantar, movilizar, realizar tresferencies, ayudar na hixene o atender les necesidaes diaries son xeres que requieren tiempu, téunica y medios materiales.

Cuando’l númberu de profesionales ye insuficiente, esa actividá acaba multiplicando los sobreesfuerzos. Hai falta de  personal abondo, equipos afayadizos y tiempu real pa utilizalos.

Nun tien sentíu sesixir a una profesional -mayoritariamente son muyeres les que trabayen nesti sector- que protexa la salú y la integridá d’una persona dependiente al tiempu que les condiciones de trabayu obliguen a comprometer la suya.

La falta de personal xenera amás un mecanismu que s’alimenta a sigo mesmu. Cuando una persona falta por una baxa médica, vacaciones, permisos o cualquier otra causa perfectamente normal nuna plantiya, les sos xeres nun desapaecen y polo xeneral nun se contrata otra persona; repartense ente quien sigue nel centru.

Eso significa con frecuencia asumir más carga, prolongar la xornada, cambiar turnos, doblalos o perder descansos, una situación que les enfermeres eventuales de Cagüeñes ya denunciaben, destacando una organización llaboral marcada pola improvisación y la precariedá, porque esti ye un problema que comparten sanidá y sector sociosanitariu.

La dinámica ye sencilla: falta una persona, aumenta la carga de les demás; aumenta’l cansanciu, medra’l riesgu de llesión o agotamientu; produzse una nueva baxa y la presión sobre la plantiya vuelve aumentar.

Doblar turnos o prolongar les xornaes puede resolver una ausencia unes hores, pero nun crea personal nuevo y tresllada’l coste de la falta de plantiya sobre quien yá ta trabayando.

Nun serviciu de curiaos, amás, el cansanciu nun afecta namái a quien trabaya. Una profesional esgotada tien que siguir movilizando persones, suministrando atención, detectando problemes y tomando decisiones que repercuten directamente nel bienestar de quienes dependen d’ella.

Per otru llau, curiar persones mayores y dependientes implica una importante carga emocional, trabáyase con persones que necesiten atención, compañía, paciencia y dignidá.

Una profesional puede saber perfectamente que determinada persona necesita más tiempu, falar, ser acompañada o recibir una atención más pausada y, al mesmu tiempu, saber que tien otres cinco o diez necesidaes esperando. Esa imposibilidá de facer el trabayu como debería facese provoca frustración, impotencia y, n’ocasiones, culpabilidá y depresión.

A la presión física y emocional súmase’l problema económicu. Resulta difícil atraer y caltener profesionales nun sector esixente cuando la remuneración nun se corresponde cola responsabilidá asumida.

Los cuidados formen parte precisamente de los sectores onde’l pluriemplegu tien una presencia importante. El fenómenu aumentó con fuerza n’Asturies nos últimos años y  curiaos figura ente les actividaes nes que más persones necesiten un segundu emplegu pa completar ingresos. El cansanciu deriváu d’esa acumulación de xornaes añade una presión más sobre la salú.

Pa torgar esti xorrecimientu de baxes, tamos obligaos a falar de ratios de personal, organización de turnos, descansos efectivos, prevención de riesgos, equipos pa realizar movilizaciones, evaluación de riesgos psicosociales y salarios capaces d’atraer y retener profesionales.

Tratar de reducir les baxes poniendo’l focu sobre la persona enferma puede proporcionar un titular fácil, pero nun resuelve nada. Menos baxes llaborales requieren más prevención, más personal, más medios, meyor organización y condiciones llaborales que permitan curiar ensin enfermar curiando.

This work is licensed under a Creative Commons Attribution 4.0 International License.