Nel corte del sistema MoMo correspondiente al 17 d’agostu, Asturies acumulaba 133 fallecimientos estimaos como atribuibles a les temperatures excesives dende’l 15 de mayu, una media d’alredor de 1,4 al día. Al mesmu tiempu, los datos del INE indiquen que’l 16,7% de los llares asturianos nun puede caltener la vivienda suficientemente fresca nel branu. Nun poder defender la casa del calor ye tamién un problema de desigualdá y de salú pública.

El calor d’esti añu ta dexando n’Asturies un balance que nun permite consideralu simplemente una incomodidá del branu. Ente’l 15 de mayu y el 17 d’agostu hai 95 díes y, nel corte consultáu del sistema de Monitorización de la Mortalidá Diaria (MoMo), estimábense 133 fallecimientos atribuibles a les temperatures excesives nel país: alredor de 1,4 al día. Nun se trata d’un recuentu de certificados de defunción nos que golpes de calor figuren como causa directa, sinón d’una estimación estadística de la mortalidá atribuible a les temperatures.

La situación tien detrás un branu excepcionalmente caliente. Xunetu de 2026 foi’l xunetu más cálidu rexistráu n’Asturies dende 1961, con una temperatura media de 20,5 ºC, 2,7 graos perriba del promediu del periodu 1991-2020. Son datos que vuelven confirmar que la idega d’Asturies como «refuxu climáticu» nun casa cola realidá d’un país que tamién tien que preparase pa episodios de calor cada vegada más intensos.

Pero’l problema nun ye namás que suban les temperatures. Ye tamién la capacidá desigual de la población pa defendese d’elles.

Demientres años falóse de probitú enerxética fundamentalmente en términos d’iviernu: families que nun podíen poner la calefacción, viviendes húmedes y mal aisllaes o persones obligaes a escoyer ente pagar la enerxía y cubrir otros gastos básicos. Esa visión quedó anticuada. La Directiva (UE) 2023/1791 define la probitú enerxética como la situación na que los llares nun pueden acceder a servicios enerxéticos esenciales pa disponer d’un nivel de vida y salú dignu, incluyendo calefacción, agua caliente, refrixeración ya iluminación adecuaes, por factores como una renta insuficiente, precios inaccesibles, un gastu enerxéticu eleváu o la mala eficiencia de la vivienda.

Y n’Asturies hai datos que demuestren que’l problema de la refrixeración nun ye teóricu. Nel últimu módulu específicu del INE sobre condiciones de la vivienda y eficiencia enerxética, correspondiente a 2023 ún de cada seisllares asturianos declaraba nun poder caltener la vivienda suficientemente fresca durante’l branu.  El mesmu estudiu del INE muestra, amás, que la dificultá pa caltener una temperatura adecuada disminúi según aumenten los ingresos del llar.

La relación ente climatización y mortalidá tien evidencia científica. Un estudiu llonxitudinal espublizáu n’Environment International estimó que l’espardimientu del aire acondicionáu foi responsable d’alredor del 28,6% de la reducción de les muertes atribuyibles al calor y del 31,5% nel casu del calor estremu, comparando los periodos 1989-1993 y 2009-2013.

Pero nun se fala namás d’instalar aparatos d’aire acondicionáu. La primer defensa tendría que ser una vivienda que necesite poca enerxía pa caltenese habitable: bon aislamientu, protecciones solares esteriores, persianes y toldos, ventilación eficaz, rehabilitación de fachaes y cubiertes y, cuando seya necesario, sistemes de climatización eficientes. Una vivienda eficiente protege tanto del fríu como del calor y reduz la cantidá d’enerxía —y de dineru— necesaria pa consiguir confort térmicu.

El problema ye que precisamente los llares con menos renta son los que tienen menos capacidá pa acometer eses inversiones. Y esa dificultá produzse nun contestu nel que la vivienda medra muncho más rápido que los salarios n’Asturies y nel que disponer d’ingresos regulares nin siquiera garantiza siempre l’accesu a una vivienda digna. Les recomendaciones sanitaries de permanecer en sitios frescos o climatizaos son correctes, pero la posibilidá real de cumpliles nun se reparte de manera igual ente la población.

El Ministeriu de Sanidá identifica como especialmente vulnerables frente al calor a les persones mayores, menores, muyeres xestantes y persones con determinaes enfermedaes cróniques, amás de quien trabaya o realiza esfuercios al aire llibre. Y señala expresamente otros factores sociales de riesgu: l’aislamientu, la dependencia, la discapacidá y les males condiciones d’habitabilidá de les persones con menos recursos.

Nesi contestu, la calidá térmica de la vivienda pasa a ser un determinante de salú. Cuando una persona vulnerable pasa gran parte del día en casa, la diferencia ente disponer d’una estancia fresca y soportar hores de temperatura elevada puede dexar de ser una simple cuestión de confort.

Cuando la recomendación sanitaria ye «caltenga la vivienda fresca», pero una parte de la población económicamente nun puede facelo, el problema nun ta namás nel termómetru: ta tamién na desigualdá pa defendese d’él. La adaptación al calor, por tanto, nun puede quedar reducida a conseyos individuales. Necesita rehabilitación de viviendes, eficiencia enerxética, protección social y polítiques públiques capaces de garantizar que protexese de les temperatures estremes nun dependa del nivel de renta.

This work is licensed under a Creative Commons Attribution 4.0 International License.