Dicir que Asturies ye un “refuxu climáticu” puede sonar bien nun estand turísticu, pero ye una irresponsabilidá política cuando’l país empieza a vivir con normalidá episodios de calor que hasta hai poco parecíen ayenos. Nun ye namás una frase desafortunada: ye una manera peligrosa de convertir una crisis global nuna oportunidá de mercáu.

Asturies nun ta fuera del cambéu climáticu. Asturies ta dientro. Tán dientro los pueblos que sufren temperatures cada vegada más altes, les persones mayores que pasen los díes de calor ensin condiciones dignes nes sos cases, les trabayadores que tienen que aguantar xornaes al sol, los montes resecos, les riegues con menos agua y les ciudaes preparaes pa un clima que yá nun esiste.

La diferencia ente tener unos graos menos que Madrid o Andalucía y ser un refuxu climáticu ye enorme. Lo primero ye una circunstancia xeográfica. Lo segundo ye una etiqueta política y turística que tapa’l problema. Porque un refuxu, pa selo de verdá, tendría que protexer. Y Asturies nun ta protexida si nun tien un plan ambiciosu d’adaptación climática, si los servicios públicos nun tán preparaos, si les villes y ciudaes siguen ensin zones de solombra abondes, si la vivienda se convierte nun productu pa quien vien fuxendo del calor y non nun derechu pa quien vive equí.

La babayada ye presentar el calentamientu global como una ventaya competitiva. La política nun pue mirar la emerxencia climática como mira una campaña de promoción turística. Nun se trata de vender frescor, sinón de garantizar vida digna. Nun se trata de presumir de paisaxe, sinón de defendelu. Nun se trata de’atrayer más xente a cualesquier preciu, sinón de cuidar a la xente que yá ta equí.

Barbón debería saber que’l cambéu climáticu nun ye un nichu de mercáu. Ye una amenaza pa la salú, pal territoriu, pa la economía rural y pa la cohesión social. Y precisamente por eso Asturies necesita menos titulares complacientes y más política climática real: rehabilitación de viviendes, solombra nos espacios públicos, tresporte coleutivu, proticción de los ecosistemes, prevención sanitaria y planificación territorial.

Asturies nun ye un refuxu climáticu. Asturies ye un país vulneráu pol cambéu climáticu que, como muncho, entá ta a tiempu de preparase meyor que otros. Pero pa eso fai falta dexar de vender la cris como si fuera una oportunidá turística y escomenzar a tratala como lo que ye: una emerxencia.

This work is licensed under a Creative Commons Attribution 4.0 International License.