Los rescates de montaña medraron un 60% n’Asturies ente 2018 y 2022 y concéntrense especialmente nel branu y nos Picos d’Europa. Non tolos accidentes son evitables, pero vender la montaña asturiana como un recursu turísticu pa tolos públicos sigue siendo un riesgu
Esti branu cuasi semanalmente lleemos en prensa información sobre rescates en montaña. Salir a caminar pela montaña asturiana nunca foi una actividá exenta de riesgu. Lo que cambió ye’l númberu de persones que s’averen a ella y la facilidá cola que güei se pue escoyer una ruta nuna aplicación, descargar un track y ponese a caminar. Los datos oficiales amuesen esa evolución: el Serviciu d’Emerxencies del Principáu d’Asturies pasó de 91 rescates de montaña en 2018 a 146 en 2022, un aumentu del 60%. Xunetu y agostu son tradicionalmente los meses con más intervenciones y los Picos d’Europa concentren bona parte de los avisos.
Hai accidentes que-y pueden pasar a cualquiera: una cayida, una llesión, una indisposición médica o un cambiu meteorolóxicu inesperáu. La preparación nun elimina’l peligru, pero amenórgalu considerablemente.
Falta cultura de montaña —conocer el terrén, les hores disponibles, los puntos d’escape y les propies llendes— pero falta tamién respetu a la mesma. El 3 d’agostu de 2026, un home que facía una ruta pela zona del Jou de los Cabrones, en Cabrales, llamó al 112 y “afirmó tar esgotáu”. El Grupu de Rescate de Bomberos d’Asturies movilizó l’helicópteru medicalizáu, atendió al senderista y dexólu en Poncebos; el coste del rescate nun sedrá abonáu pol senderista, sinón pol Principáu.
Los datos del Principáu permiten identificar dellos patrones. Les llesiones nes estremidaes inferiores son la causa más avezada de rescate, y l’Alministración relaciona una parte d’elles col usu de calzáu inadecuáu. La desorientación por niebla o por cambios de tiempu y les persones que se pierden o que queden atrapaes en zones escarpaes de les que nun saben salir son tamién motivos frecuentes d’intervención.La preparación tampoco se reduz a llevar bones botes. Conocer la montaña significa entender que ye un espaciu natural, ganaderu y humanu con normes distintes a les de la ciudá. Hai ganao, perros guardianes, cierres, pasos tradicionales, desniveles, cursos d’agua y terrenos onde nun hai cobertura.
Hai que saber que n’Asturies una mañana de sol nun garantiza una tarde escamplada. La niebla pue facer desaparecer en minutos una referencia visual evidente; una senda aparentemente clara pue tracamundiase nun cruce y un terrén relativamente fácil en seco pue complicase radicalmente cola lluvia. Un teléfonu con GPS ye una ayuda enorme, pero la cobertura falla y un track nun convierte automáticamente a quien lu sigue en conocedor de la montaña.
Hai que saber interpretar per ónde se camina. Y hai que entender que non toles rutes son comparables. La propia Travesera Integral de los Picos d’Europa, una de les grandes pruebes de montaña que pasen por Asturies, supera los 74 quilómetros y los 13.000 metros de desnivel acumuláu y necesita más de 200 voluntarios pa garantizar la seguridá de los participantes. La existencia d’un senderu, una reseña en internet o un track descargable nun diz, por sigo sola, nada sobre si una persona concreta ta preparada pa percorrelu.
Nun se pue entender el monte como un productu turísticu nel que tolo que nun ta preparao pal visitante constitui una deficiencia. Xorrecen les demandes de visitantes que traten l’espaciu natural como si fuera un parque d’atracciones. La montaña nun tien por qué tar adaptada a les capacidaes de cada persona: ye cada persona quien tien que valorar si ta preparada pa entrar nella. La cuestión va más allá de la seguridá individual. Los Picos siguen siendo un territoriu nel que viven y trabayen persones, especialmente ganaderos, cuyos medios de vida nun pueden ser estorbaos pol arruelu y caprichu ayén.
Los rescates non solo tienen un coste económicu -cuerre la idega de que tolos rescates se-y cobren automáticamente a la persona auxiliada, pero nun ye asina, namás nos casos más graves, cuando se desoyen alertes meteorolóxiques roxes, se penetra ensin autorización en zones prohibíes o restrinxíes, nun se lleva l’equipamientu afayadizu o’l rescate se produz practicando determinaes actividaes consideraes de riesgu tienen que facer frente al cobru- sinon que, sobre tou, tienen un coste humanu. Un rescate moviliza persones que tienen qu’entrar nel mesmu terrén nel que otra persona tuvo problemes y que, en ocasiones, tienen que facelo de nueche, con mal tiempu o con visibilidá escasa. Y mientres un equipu atiende una intervención evitable, puede tar necesitándose n’otru puntu pa un accidente imposible de prevenir.
This work is licensed under a Creative Commons Attribution 4.0 International License.
