• Portada
  • >
  • Opinión
  • >
  • Pisapraos, mediomenús, mexacunetes… reir por nun llorar

Pisapraos, mediomenús, mexacunetes… reir por nun llorar

  • 30 Xuño, 2022

Nestos díes ta de plena actualidá’l #pisapraos, hastag baxo’l que se recueyen los más absurdos comentarios de turistes que vienen a Asturies y nun comprenden que seya Asturies. Nun se si recomendároslo o alvertivos de que nun entameis, la verdá ye que #Pisapraos ye un viciu, entama ún a lleelo y nun ye a aparar. Resumo. 

Asturies ye un llugar incómodu. Llueve. Los pitos cancien por estorbar, el cuchu nun arreciende prestoso, el prau güel a prau y pelos caminos de cabres hai cabres, y enriba ta pindio; la marea dexa la playa “medio seca” y pa rematar les gavilotes roben los cachopos a la mínima que te descuries.

Hai ocle na mar, perros pelos pueblos, los rapacinos faen ruiu nos parques, la utilidá de Santa María del Naranco ye “incierta” ya’l bus a los Llagos cóbrentelu aunque haiga borrina.

Nos chigres ponen endemasiada comida y nun hai quien pueda con too, cobren dos menús a preciu de cuasi dos menús y si ye tarde ya’l chigre ta preslláu, nun sirven.

Les demandes de los pisapraos van dende pedir que prendan pa ellos los bufones de Pría a llamentar que la montaña nun seya acesible en siella de ruedes, pasando por quexase de que dende’l cantil se vea la mar. Pero la mio favorita ye esta: nun parque natural de montaña quedes “Solo ante la naturaleza, te dejan a tu suerte”

¿Y qué decir de los asturianos? Pa entamar, nun falen español, lo que ye imperdonable, pero ye que amás pretenden aparcar nel so pueblu, quitando aparcamientu a los visitantes, y son antipáticos colos turistes, que vienen cola meyor intención a salvalos de la so miseria colos 65€ de media por díe que gasten n’Asturies.

 

Nun hai señales de prohibío aparcar nes playes, caleyes nin monumentos, y lluéu si el tractor nun pasa o los vecinos nun pueden abrir la puerte casa, enfádense. Pa rematar, nos meyores sitios hai munchos turistes, y eso estorba muncho a los turistes.

En resume, dexen nidio qu’Asturies nun ta fecho pa ellos. Tamos d’alcuerdu, equí tampocu queremos esi turismu inorante y prepotente que pretende facer de los Picos un barriu agreste de Madrid, pero hai que tar sollerte, pente tanta coña escuéndese un fechu innegable: pretenden qu’Asturies camude al so gustu y muncho me temo que pali que pali van consiguiéndolo.

Llucía F. Marqués

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies