El vecindáu de Trevías sigue defendiendo la necesidá d’un nuevu saneamientu, pero reclama que la depuradora prevista nun s’allugue nel centru de la llocalidá. Dempués de meses de movilizaciones, reuniones y recursos, la plataforma vecinal pide información, tresparencia y que les alministraciones estudien de manera efectiva les alternatives comprometíes

El proyectu impulsáu pola Conseyería de Movilidá, Mediu Ambiente y Xestión d’Emerxencies contempla una inversión de 2,94 millones d’euros pa renovar el saneamientu y construyir una nueva EDAR que daría serviciu a cerca de 500 persones. La necesidá de la obra nun ye lo que cuestiona’l vecindáu: la oposición céntrase nel emplazamientu, próximu a viviendes y a espacios como’l colexu, el centru de salú y les instalaciones deportives.

La reivindicación llegó a la Xunta Xeneral, que’l 30 d’abril aprobare una proposición non de llei reclamando suspender la llicitación, descartar l’allugamientu previstu y estudiar alternatives técnicamente viables con consensu vecinal. El Gobiernu asturianu, pela so parte, defende la necesidá ambiental del saneamientu y señala que les posibles alternatives tán condicionaes por cuestiones como’l riesgu d’inundación y la protección de suelos agrarios. L’alderique vuelve poner enriba la mesa’l papel de la ciudadanía nes decisiones sobre servicios básicos como l’agua y el saneamientu.

La situación acabó tamién nos tribunales. Na última actualización pública, del 4 de xunetu, la plataforma informó de que nel contenciosu-alministrativu s’acordara una midida cautelar provisional y que taba pendiente la resolución sobre la cautelar definitiva. Tamién esplicaba que’l TSXA requiriera nuevamente documentación del expediente a la Conseyería.

Pero, perriba de procedimientos y informes, el mensaxe del vecindáu sigue siendo’l mesmu: “Saneamientu sí. Depuradora nel centru’l pueblu, non”. Pa los vecinos, un pueblu que reclama soluciones y servicios merez, “como mínimo, ser escucháu”. Consideren que gobernar implica tamién dialogar, reconocer los problemes y revisar les decisiones cuando hai alternatives por estudiar, especialmente nun Occidente que lleva años reclamando atención ya infraestructures.

La plataforma reconoz que nos últimos meses meyoró la comunicación cola Conseyería, pero sigue reclamando información clara sobre les consultes realizaes a la Confederación Hidrográfica y a la CUOTA, y ye especialmente crítica cola comunicación del Conceyu de Valdés. Pa Trevías, la cuestión yá nun ye namás onde va construyise una depuradora, sinón tamién cómo tienen de tomase les decisiones públiques: con tresparencia, información y respetu hacia quienes viven nel territoriu.

This work is licensed under a Creative Commons Attribution 4.0 International License.