L’Asociación Vecinal Gigia considera positiva la declaración del barriu como zona tensionada, pero reclama dir más allá del control de los precios: frenar la perda de vivienda residencial, nun conceder más llicencies turístiques y recuperar pisos pa la población que quier siguir viviendo en Cimavilla.
La vecindá de Cimavilla reclama al Principáu d’Asturies que les viviendes d’usu turísticu (VUT) pierdan esa condición cuando cambien de propietariu y vuelvan al mercáu residencial. La propuesta apaez nel boletín de xunetu de l’Asociación Vecinal Gigia, L’ atalaya del playu, onde’l colectivu defende que la declaración del barriu como zona de mercáu residencial tensionáu ye una midida positiva, pero insuficiente si nun va acompañada d’actuaciones que permitan recuperar vivienda pa vivir.
La declaración de Cimavilla como zona tensionada llega depués d’un procesu llargu y con posiciones enfrentaes ente alministraciones. En marzu de 2025 PP y Foro votaron nel Plenu de Xixón contra la declaración de Cimavilla y L’Arena como zones tensionaes, anque la competencia final correspondía al Principáu. Finalmente, la resolución autonómica que declaró dambos barrios ye del 14 de mayu de 2026 y la declaración quedó incorporada en xunetu al llistáu estatal de zones tensionaes.
Pa Gigia, la cuestión nun se reduz al preciu del alquiler. El problema de fondu ye que cada vegada hai menos pisos disponibles pa les persones que quieren residir de manera permanente nel barriu. Una situación sobre la que la propia vecindá lleva años dando l’alarma: en 2024, nun alderique sobre masificación turística y xentrificación entamáu en Cimavilla, yá s’alvertía de les dificultaes pa permanecer nel barriu y calculábase que cerca d’una de cada diez viviendes dexare de cumplir una función residencial estable.
La presión turística sobre’l parque de vivienda nun ye esclusiva de Cimavilla. casi’l 60% de les places turístiques de Xixón tan en pisos que podríen destinase a vivienda. Los datos analizaos entós contabilizaben 6.340 places en viviendes d’usu turísticu, frente a 4.642 places hoteleres, nun conceyu nel que’l pesu d’esti tipu d’agospiu venía medrando con rapidez.
Esa evolución produzse amás nun mercáu inmobiliariu nel que la población residente lleva años soportando xubíes importantes. Yá en 2024 alvertíase de que’l turismu taba marcando los precios de los alquileres xixoneses, con una medría interañal del 16% y una ufierta residencial cada vegada más escasa frente a la rentabilidá mayor del alquiler vacacional. La consecuencia ye especialmente visible nos barrios con mayor presión turística y na población mozo, que tien cada vegada más dificultaes pa independizase ensin abandonar la so contorna.
Énte esta situación, Gigia plantea tres llinies d’actuación: rehabilitar los inmuebles públicos que puedan destinase a vivienda, movilizar los pisos vacíos y protexer de manera efectiva l’usu residencial. A ello suma una reclamación concreta: que nun s’autoricen más viviendes turístiques y que les actuales autorizaciones nun queden venceyaes indefinidamente al inmueble. La propuesta ye que, cuando se produza una compraventa, la nueva propiedá nun herede automáticamente la posibilidá de siguir destinando’l pisu al turismu.
La reclamación produzse amás nun momentu nel que la declaración de zones tensionaes ta estendiéndose per Asturies, confirmando que les dificultaes d’accesu a la vivienda y la falta d’ufierta residencial yá nun son problemes puntuales d’unos pocos barrios. InfoAsturies vien señalando cómo la conversión de vivienda en productu d’inversión, alquiler turísticu o segunda residencia coincide cola medría de los precios y cola dificultá creciente de la población pa atopar una casa nel so propiu conceyu.
Dende Gigia nun cuestionen la importancia económica del turismu pa Xixón, pero consideren que nun pue crecer a costa d’un recursu limitáu y esencial como ye la vivienda. Pa la asociación, l’ésitu de la declaración como zona tensionada nun se va midir namái na evolución del preciu del metro cuadráu, sinón na capacidá de Cimavilla pa siguir siendo un barriu habitáu: con reciella, mocedá, comerciu vecinal y persones que puedan vivir de manera estable nos mesmos portales y cais que güei soporten una de les mayores presiones turístiques de Xixón.
This work is licensed under a Creative Commons Attribution 4.0 International License.
