El Gobiernu asturianu entama los trámites pa declarar Uviéu, Xixón, Ribeseya, La Pola Siero y Llugones zones de mercáu residencial tensionáu. La ampliación confirma que’l problema de la vivienda nun afecta yá a barrios o villes concretes: espárdese pel área central y bona parte de la costa

El conseyeru de Vivienda, Ovidio Zapico, anunció l’entamu d’una segunda fase de declaraciones de zones tensionaes que va incluyir Uviéu, Xixón, Ribeseya, La Pola Siero y Llugones. Enantes, el Gobiernu pretende rematar los espedientes d’ampliación d’Avilés y La Felguera y tramitar les solicitúes de Muros y San Esteban, en Muros. La categoría, prevista na Llei estatal de Vivienda, permite llendar determinaes xubíes del alquiler y obliga a diseñar actuaciones pa ampliar la ufierta residencial asequible.

La noticia podría presentase como una ampliación de les polítiques públiques de vivienda. Pero tamién ye la constatación d’un fracasu acumuláu. Cuando les principales ciudaes, les mayores llocalidaes del centru y un númberu creciente de villes costeres precisen una declaración estraordinaria porque los precios y la falta d’ufierta torguen l’accesu a una casa, el problema nun ye coyuntural nin llocal. Ye’l resultáu d’un modelu territorial y económicu que convirtió la vivienda nun productu d’inversión, una fonte de renta turística o una segunda residencia, enantes que nun drechu de la población.

La contradicción ye evidente. El Gobiernu lleva años llamando a atraer turismu masivamente y población flotante. El presidente Adrián Barbón llegó a presentar Asturies como un territoriu atractivu pa “vivir, trabayar ya invertir”, al tiempu que defendía programes d’ayuda pa les persones teletrabayadores que fixaren equí la residencia.

InfoAsturies yá venía alvirtiendo de la paradoxa en Una Asturies pa vivir… ¿o pa consumir?: nun se pue combatir la despoblación ensin garantizar primero que la población tenga onde vivir. Tampoco resulta coherente gastar recursos en campañes de retornu, captación de profesionales o promoción del mediu rural mientres la vivienda disponible pasa al alquiler turísticu, queda zarrada gran parte del añu o se reserva pa una demanda con mayor capacidá económica.

El problema afecta especialmente a la mocedá. La combinación de salarios baxos, temporalidá llaboral, fiances, avales y alquileres crecientes convirtió la emancipación nun privilexu, como yá analizaba esti mediu en L’alquiler imposibilita l’emancipación de la mocedá asturiana. La consecuencia nun ye solo residencial: retrásase la formación de families, afóndase la cayida de la natalidá y empúxase a marchar precisamente a les xeneraciones que les instituciones dicen querer retener.

A estos altores, falar de “zones tensionaes” como escepciones aisllaes empieza a resultar poco creyible. Les doce primeres declaraciones incluyeron L’Arena y Cimavilla, en Xixón; La Madalena, n’Avilés; Lluanco; Arenas y Po, en Cabrales; y seis núcleos del conceyu de Llanes: la villa, Posada, Nueva, Po, Barru y Celoriu. Agora súmense nuevos espedientes nel centru, les cuenques y la costa. Nun ye entá “toa Asturies” en términos xurídicos, pero’l mapa dibuxa una crisis estendida que va dende les grandes ciudaes hasta les villes turístiques.

Difícil d’esplicar ye l’ausencia de determinaes fasteres, comu ye’l casu de L.luarca y d’otros núcleos de la costa occidental nes fases anunciaes. Poro, reclámase que’l Gobiernu publique los análisis territoriales y aclare por qué unes villes entren nos espedientes y otres non. La estacionalidá de los contratos y la conversión de pisos en aloxamientos vacacionales nun son fenómenos esclusivos de Llanes, Ribeseya o Lluanco. 

La declaración de zona tensionada puede ser una ferramienta útil, pero nun ye una solución máxica. Topar determinaes rentes sirve de poco si la vivienda escapa hacia contratos de temporada, si nun se movilicen los inmuebles vacíos, si’l parque públicu sigue siendo insuficiente y si les alministraciones nun construyen nin rehabiliten a la velocidá que precisa la población. Nun falten viviendes, sobren especuladores, la crisis nun consiste únicamente nuna escasez física de cases, sinón nel destín que se da a les yá existentes.

El casu de Xixón amuesa bien la dimensión del conflictu. La presión del turismu, l’escasez d’oferta estable y la rentabilidá del alquiler de curtiu duración vienen influyendo nos precios dende hai años. Declarar agora toa Xixón zona tensionada supondría reconocer que’l problema va muncho más allá de L’Arena y Cimavilla y que la crisis llegó a barrios onde nun existe una presión turística comparable, pero sí salarios insuficientes y una oferta cada vegada más escasa.

Asturies nun puede aspirar a recuperar población ensin una política de vivienda que tenga’l mesmu pesu que la promoción turística o la captación d’inversiones. Tampoco se pue llamar a la diáspora pa que torne y, al mesmu tiempu, permitir que vivir nel país resulte económicamente imposible. La despoblación, analizada en Asturies, ¿camín del desiertu demográficu?, nun se combate con propaganda: combátese con emplegu estable, servicios públicos y cases disponibles a precios que la población pueda pagar.

La multiplicación ye, primero de too, una señal d’alarma. Demuestra que la vivienda dejó de ser un problema de dellos barrios y convirtióse nuna de les principales llendes pal futuru d’Asturies. 

This work is licensed under a Creative Commons Attribution 4.0 International License.