La EPA del segundu trimestre amuesa una recuperación bien feble de la ocupación respecto al entamu del añu, pero’l balance interañal ye negativu: hai 5.400 persones ocupaes menos, el paru medra y la perda de trabayu industrial contrasta cola creación d’emplegu temporal y a tiempu parcial en sectores venceyaos a la campaña turística.

Los datos del segundu trimestre de la Encuesta de Población Activa dibuxen dos realidaes bien estremas pal mercáu llaboral asturianu. Ente abril y xunu, Asturies sumó 3.600 persones ocupaes respecto a los tres primeros meses del añu, hasta algamar les 433.800. Sicasí, al comparar la situación cola del mesmu trimestre del 2025, el resultáu camuda: nel últimu añu perdiéronse 5.400 emplegos, una cayida del 1,23%.

La evolución asturiana contrasta cola del conxuntu del Estáu. España preslló’l trimestre con 22,779 millones de persones ocupaes, 486.000 más que nel trimestre anterior y 510.200 más que va un añu. La tasa estatal de paru baxó hasta’l 9,87%, el nivel más reducíu dende’l 2008.

N’Asturies, pela contra, el desemplegu medró en 900 persones durante’l trimestre, hasta llegar a les 43.500. La subida producióse porque la población activo medró en 4.500 persones y la creación d’emplegu nun foi quien a absorber a tola xente que s’incorporó al mercáu llaboral. La tasa de paru xorreció asina en 0’10 puntos

El deterioru resulta entá más evidente na comparación interañal: Asturies tien agora 2.400 persones paraes más que nel segundu trimestre del 2025. Amás, la tasa d’actividá, anque xubió hasta’l 52,41%, sigue siendo la más baxa de tolos territorios del estáu y queda cuasi siete puntos perbaxo de la media estatal, allugada nel 59,29%.

El datu más esmolecedor ta na evolución sectorial. Nel últimu añu desaniciáronse 7.300 emplegos industriales n’Asturies, una perda especialmente relevante nun territoriu onde la industria sigue teniendo un pesu económicu, territorial y social superior al de bona parte del Estáu.

Nun se trata namás d’una reducción numbérica. L’emplegu industrial ta tradicionalmente venceyáu a puestos de mayor estabilidá, cualificación y remuneración, amás de caltener una rede amplia d’empreses auxiliares, tresporte, servicios técnicos y actividá comercial.

La ocupación que se recupera durante’l trimestre concéntrase, sobre manera, en sectores con una fuerte componente estacional, como la hostelería y el turismu. El resultáu ye una sustitución progresiva de trabayu industrial por emplegos más dependientes de les campañes, con mayor rotación y unes condiciones llaborales xeneralmente más precaries.

Esta evolución produzse nun trimestre que suel ser favorable pal emplegu pol entamu de la temporada turística. A pesar d’esi impulsu, la ocupación asturiana namás medró un 0,83% respecto al trimestre anterior, frente al aumentu estatal del 2,18%.

La cuestión nun ye namás cuántos puestos de trabayu se creen, sinón qué tipu d’emplegu sustitúi al que desaparez. Los datos apunten a un aumentu de la contratación temporal y de les xornaes a tiempu parcial, dos factores que reducen la estabilidá de los ingresos y dificulten la construcción d’una trayeutoria profesional continuada.

Esta realidá afecta especialmente a les actividaes venceyaes a la temporada turística, onde una parte importante de la contratación concéntrase en pocos meses y nun garantiza continuidá cuando acaba’l branu. La recuperación puntual de la ocupación nun compensa, poro, la perda anual d’emplegu nin el retrocesu de los sectores productivos con mayor capacidá pa xenerar trabayu estable.

La evolución de la EPA confirma una ralentización del mercáu llaboral asturianu y una xorreciente terciarización de la economía derivada del apueste del gobiernu del Principáu pol turismu. 

L’alderique, poro, nun pue llindase a celebrar la creación de 3.600 emplegos nun trimestre tradicionalmente favorable. Detrás d’esa cifra hai una perda anual de 5.400 persones ocupaes y un retrocesu de 7.300 puestos industriales. Asturies ta sustituyendo’l so texíu productivu por una economía cada vegada más dependiente de la estacionalidá y la precariedá.

This work is licensed under a Creative Commons Attribution 4.0 International License.