Momentu de la carga policial

L’Aeropuertu de Loiu -onde se recibió a los solidarios de la Flotina de la Llibertá a golpes- y los trenes asturianos tienen daqué en común: un serviciu de seguridá a cargu d’un conglomeráu empresarial d’orixe israelín fundáu por antiguos miembros del Shin Bet, los servicios secretos interiores d’Israel

La llegada d’un grupu d’activistes de la Flotina de la Llibertá al aeropuertu de Loiu acabó esti vienres con violentes cargues y agresiones por parte de la Ertzaintza, nuna actuación que les persones presentes calificaron de desproporcionada ya ensin xustificación

Les imáxenes y testimonios espublizaos nes redes sociales amuesen una intervención policial estremadamente agresiva ensin que mediare provocación previa contra un grupu que recibía a los heroes de la flotina con una acción de solidaridá cola causa palestina. La violencia de la respuesta policial sorprendió inclusive a persones presentes nel recintu aeroportuariu, qu’aseguraron nun entender la dimensión del dispositivu desplegáu.

Pero una actuación tan dura y difícil d’esplicar nun contestu d’estes característiques empieza a atopar dalguna explicación cuando s’escarba un pocu alredor de quién controla precisamente la seguridá del aeropuertu de Loiu.

La seguridá del aeropuertu ta en manos d’I-Sec, filial del grupu ICTS, un conglomeráu empresarial d’orixe israelín fundáu por antiguos miembros del Shin Bet, los servicios secretos interiores d’Israel. Anque’l grupu presenta sede nos Países Baxos, el so centru d’investigación y desendolcu, asina comu’l so capital, ta asentáu n’Israel y la empresa caltién estrechos vínculos col aparatu de seguridá israelín.

El presidente d’ICTS, Menachem J. Atzmon, foi condergáu en 1996 por fraude na financiación de campañes electorales cuando yera tesoreru del Likud, el partíu de la drecha israelina. Otra filial del conglomeráu, Au10tix, trabaya pa grandes plataformes tecnolóxiques como X y PayPal na verificación d’identidaes.

Lloñe de ser una presencia anecdótica, ICTS y I-Sec consiguieron nos últimos años una posición privilexada na xestión de la seguridá d’infraestructures estratéxiques del Estáu español. Dende 2015 vienen recibiendo contratos millonarios del Gobiernu Vascu: primero pa la seguridá de los puertos de Bizkaia y depués pa instalaciones especialmente sensibles como’l supercuartel de la Ertzaintza n’Oiartzun o l’Academia Vasca de Policía y Emerxencies d’Arkauti, onde  la Ertzaintza contrató al grupu ICTS (matriz de I-Sec)

En 2020, el grupu fíxose cola seguridá del cuartel d’Oiartzun por dos millones d’euros y cola d’Arkauti por otros 1,5 millones. Tamién presta servicios a Osakidetza y a Metro Bilbao, qu’en 2025-y adjudicó un nuevu contratu de xixilancia por valor de 6,4 millones d’euros.

La cuestión va más allá d’una simple empresa privada de vixilancia. Nos últimos años, el conglomeráu foi consolidando presencia n’aeropuertos, estaciones ferroviaries y servicios públicos estratéxicos del Estáu español, coincidiendo con un procesu d’externalización creciente de la seguridá pública.

La presencia del conglomeráu ICTS/I-Sec n’Asturies ye tamién destacable Nos últimos años, estes empreses d’orixe israelín fueron ganando posiciones en sectores estratéxicos venceyaos al tresporte y la seguridá, especialmente alredor de la rede ferroviaria y de servicios consideraos críticos.

La propia I-Sec reconoció públicamente en mayu de 2026 que recibió una “mención colectiva” pol so serviciu d’acompañamientu de trenes n’Asturies nel marcu del Día de la Seguridá Privada celebráu n’Uviéu.

N’Asturies, onde la rede de Cercaníes y l’antigua FEVE tienen un papel clave na movilidá diaria, la presencia d’empreses d’esti conglomeráu resulta especialmente significativa. La rede ferroviaria asturiana ye considerada infraestructura crítica y mueve miles de persones cada día ente Uviéu, Xixón, Avilés, Llaviana o Infiestu.

Nel contestu de les agresiones de la Ertzaintza contra integrantes de la Flotina nel aeropuertu de Loiu, esti entramáu empresarial cobra especial relevancia. La violenta actuación policial, difícil d’entender nun recibimientu d’activistes solidarios, adquier otra dimensión cuando se conoz que la seguridá del propiu aeropuertu ta controlada por una empresa integrada nun conglomeráu d’orixe israelín especializáu en control aeroportuariu y seguridá d’infraestructures crítiques.

La rápida expansión d’estes empreses n’aeropuertos, servicios ferroviarios y infraestructures crítiques del Estáu, malpenes unos años dempués de la so implantación nel mercáu español, vien xenerando cada vez más entrugues sobre’l papel que xueguen intereses empresariales y xeopolíticos na xestión de la seguridá pública.

This work is licensed under a Creative Commons Attribution 4.0 International License.