La capital asturiana va acoyer la programación de vienres y sábadu y Güeñu va cerrar el festival el domingu. María Arnal, Depresión Sonora, Puño Dragón, Dora Band o Mujeres lideren un cartelu diversu que reflexa’l meyor momentu de la escena independiente.

Uviéu va volver convertise n’epicentru de VESU, que va celebrar, del 26 al 28 de xunu, la so séptima edición. El festival de música independiente, que padrocinen la Fundación Municipal de Cultura del Conceyu d’Uviéu y el Conceyu de La Ribera, vuelve asina a los oríxenes con una distribución que combina espaciu urbanu y rural.

D’esta manera, la capital asturiana va concentrar los conciertos del vienres y el sábadu, mientres que’l domingu Güeñu va convertise nel escenariu pa zarrar esta edición.

Tocante a la programación, VESU vuelve apostar por una seleición cuidada de nomes clave de la escena independiente actual. Pel Escenariu Vibra Mahou, asitiáu nel Espaciu FMC d’Uviéu, van pasar artistes como María Arnal, que va presentar el so nuevu proyectu AMA nel so únicu conciertu n’Asturies; Depresión Sonora; Dora Band —nueva etapa de Pimp Flaco y Kinder Malo—; los asturianos Puño Dragón; y grupos como Muyeres, Sobrezero, Las Petunias, DenisDenis o los británicos Snake Eyes. A esta programación va sumase amás el Conciertu Vibra Mahou, una sorpresa que se desvelará nes próximes selmanes.

El domingu, “VESU na Ribera” va cuntar con dos bandes pa poner el ramu al festival: Begut, que yá participara nel VESU como parte de la banda de Carlos Ares y que va presentar el so trabayu Un diez en lo emocional, y la Billy Boom Band, cola so propuesta familiar.

En cuanto a los espacios, l’Espaciu FMC d’esti añu va tar allugáu n’El Campillín, dientro del recintu de la Fundación Educativa Santo Domingo – Dominicos, un Bien d’Interés Cultural que’l festival quier poner en valor. Pela so parte, la xornada final en Güeñu va desarrollase na CAB (Central Artística de Bueño), onde se va celebrar una sesión vermú con ambiente festivo, estendiendo la experiencia del festival más allá de la ciudá.

Con esta nueva edición, VESU afita la so identidá como un de los festivales más singulares del norte, combinando una programación contemporánea con bandes consoldidaes y grupos emerxentes. Conviértese asina nun puntu de referencia pa quien busquen propuestes musicales estremaes.

Los abonos yá tán disponibles , a un preciu de 50 euros más gastos de xestión, al traviés de la web www.vesuoviedo.com.

This work is licensed under a Creative Commons Attribution 4.0 International License.