CSIF denuncia que tan cubriéndose alredor de 65 places a deu, ensin realizar el procesu llegal d’escoyeta y con más de  7.000 solicitudes ensin revisar.

La xestión reciente del personal nel Serviciu Públicu d’Emplegu despierta sospeches de vuelta al tradicional sistema de contratación a deu por amiguismu que tantes allegries dió a los socesivos gobiernos del PSOE. 

El conflictu xurde alredor de la creación del cuerpu d’orientadores llaborales. Tres intentos anteriores que nun prosperaron por falta de base llegal, el Principáu aprebó finalmente esta categoría y convocó una bolsa estraordinaria nel mes de marzu.  La cantidá de solicitantes superó con muncho la capacidá de xestión de l’Alministración, quedando miles d’espedientes ensin tramitar, falándose de más de 7.000 solicitúes ensin revisar, lo que supón, na práctica, dexar fora del procesu a una parte importante de les persones interesaes.

Polo menos, esa incapacidá de xestión ye la esculpia oficial pa la decisión de cubrir les necesidaes de personal mediante seleiciones direutes. Según denuncia’l sindicatu CSIF, esta fórmula ta utilizandose pa incorporar decenes de persones —alrodiu de 65— ensin recurrir a les bolses públiques nin garantizar los principios d’igualdá, méritu y capacidá.

Les sospeches de tratu de favor vense reforciaes pol perfil d’una parte de les persones contrataes, munches con venceyu previu a entidaes collaboradores o al propiu sistema d’emplegu. 

Amás, dellos críticos señalen que, casu de ser un problema d’incapacidá de xestión -ya de por si grave- esisten alternatives llegxales que nun tan utilizándose, como les bolses d’otros cuerpos alministrativos con perfiles asemeyaos, onde sí hai persones que superaron procesos selectivos. 

El malestar ye especialmente intensu ente quienes lleven años preparando oposiciones pa estes places y tienen que ver comu otros les ocupen ensin pasar dalu procesu d’escoyeta. Pa estes persones, la posibilidá de qu’estes contrataciones desemboquen nel futuru en procesos d’estabilización supón un agraviu comparativu claru, al consolidar puestos ensin pasar por un procesu selectivu completu.

Dende CSIF esíxese que se publique de manera inmediata la llista de la bolsa, con puntuaciones y orde de prelación, como primer pasu pa recuperar la tresparencia. Mentanto, dellos afectaos yá tán valorando recurrir a la vía xudicial, cola preparación d’un recursu contenciosu-alministrativu si la situación nun se corrige.

This work is licensed under a Creative Commons Attribution 4.0 International License.