L’autorización del nuevu dique y de la nueva ordenación del puertu de Figueras, en Castropol, vuelve poner enriba la mesa un modelu de xestión de la mariña qu’apuesta polos intereses d’una élite mientres se dexen de llau los usos tradicionales, el patrimoniu popular y la protección ambiental.

Barcos de pesca amarraos nel actual dique.

El proyectu autoriza retirar l’actual dique flotante y sustituyilu por un dique fixu de 185 metros, amás d’un dragáu de 29.183 metros cuadraos hasta cinco metros de fondura, xenerando más de 54.000 metros cúbicos de materiales pa verter al mar. Tamién contempla derribar el muelle central ya instalar nuevos pantalanes con 124 atraques pa embarcaciones deportives. Pa la pesca profesional, namái siete amarres. Lo que se presenta como una modernización del puertu ye, en realidá, una tresformación pensada principalmente pal usu recreativu y turísticu d’embarcaciones privaes.

La cifra fala por sigo sola. Nun ye una actuación pensada pal sector pesqueru nin pal pueblu que fixo del puertu un espaciu de trabayu y vida durante xeneraciones. Ye una redistribución del espaciu públicu pa priorizar yates, llanxes de recreu y navegación privada frente a la economía tradicional vinculada a la mar.

Mientres el pueblu pierde usu productivu y accesible, gana terrén una concepción elitista del puertu como aparcamientu náuticu. L’espaciu que yera ferramienta de subsistencia y cultura marinera pasa a ser un serviciu pa quien pue pagar embarcaciones d’arruelu. Ye’l mesmu procesu que se repite en munchos llugares: privatización indirecta de lo común baxo’l discursu del progresu.

Pero amás hai una dimensión ecolóxica especialmente grave. L’actuación afecta a un espaciu d’altísimu valor ambiental: la ría del Eo, la Reserva Natural Parcial, la Reserva de la Biosfera Oscos-Eo-Terras de Burón, el Humedal RAMSAR, el Llugar d’Interés Comunitariu Ría del Eo-Playa de Barayo y la Zona d’Especial Protección pa les Aves. Nun falamos d’un enclave cualquiera, sinón d’un ecosistema fráxil y reconocíu internacionalmente.

El dragáu y los vertíos previstos pueden alterar fondos marinos, corrientes, sedimentos y hábitats esenciales pa peces, aves y otres especies. Tamién preocupa l’efeutu sobre la dinámica natural de les agües y el movimientu de la sable, nuna ría especialmente delicada. Intervenir nun sistema vivu ensin garantíes suficientes ye xugar col futuru del ecosistema.

Tamién se destrúi paisaxe. L’actual dique flotante tien un impactu visual amenorgáu. El nuevu dique fixu, eleváu unos dos metros sobre la marea alta, cambiaría de manera notable la percepción de la ría. Onde güei hai continuidá visual ente les orielles de Figueras, Castropol y Ribadeo, habría una barrera artificial y una acumulación d’embarcaciones recreatives.

La contradicción de los xestores políticos ye evidente, ellos mesmos criticaren enantes les obres nel puertu de Ribadeo polos sos impactos na ría y autoricen agora una actuación asemeyada.

El casu de Figueras exemplifica un conflictu de fondu: quién decide pa qué sirven los puertos y en xeneral los espacios públicos y a quién beneficien. 

This work is licensed under a Creative Commons Attribution 4.0 International License.