L’El Hospital Universitariu Central de Asturias da un pasu más na llucha contra’l cáncer cola incorporación d’una novedosa terapia dirixida al tratamientu del cáncer de próstata metastásicu, una de les formes más complexes d’esta enfermedá 

El centru sanitariu asturianu aplicó yá esta técnica per primer vegada nel país, dende’l Serviciu de Medicina Nuclear, abriendo una nueva vía pa pacientes que nun respondíen a los tratamientos convencionales. Trátase d’una terapia basada en radioligandos, una ferramienta de medicina de precisión que permite actuar directamente sobre les célules tumorales.

El funcionamientu d’esta técnica parte d’un procesu previu d’estudiu con imaxe avanzada, que facilita identificar con exactitú les zones afeutaes. Esto ye posible al traviés d’un radiofármacu que s’une a una proteína presente na mayoría de tumores de próstata avanzaos, lo que permite localizar con precisión el cáncer nel organismu.

Una vegada detectaes les célules malines, aplícase’l tratamientu, conocíu comercialmente como Pluvicto, que lleva la radiación directamente al tumor. D’esta manera, conséguese un efeutu más selectivu, minimizando los daños nos texíos sanos y aumentando la eficacia terapéutica.

Los estudios clínicos internacionales apunten a que esti tipu de terapia contribúi a allargar la supervivencia, retrasar l’avance de la enfermedá y ameyorar la calidá de vida de los pacientes, factores clave nes fases más avanzaes del cáncer.

Cola incorporación d’esta técnica, el HUCA asitiase ente los centros que tán apostando pola innovación y pola personalización de los tratamientos oncolóxicos, una tendencia cada vez más presente na medicina actual.

El cáncer de próstata ye’l tumor urolóxicu más frecuente ente los homes y una de les principales causes de mortalidá por cáncer en varones. Nesti contestu, la llegada d’esti tipu de terapies supón una oportunidá pa ampliar les opciones de tratamientu y dar respuesta a casos que, hasta agora, cuntaben con menos alternatives.

This work is licensed under a Creative Commons Attribution 4.0 International License.