Pesi a la victoria xudicial, dende’l Conceyu contra la Incineración son coscientes de que queda batalla y reabren el so micromecenazgu y recoyida de firmes cara a tar preparaos pa un probable recursu xudicial por parte d’Hunosa

Llogu del Conceyu contra la Incineración

La quema de residuos na central térmica de La Pereda, en Mieres recibió un revés xudicial importante: el Tribunal Superior de Xusticia d’Asturies dio la razón al Conceyu contra la Incineración y anuló l’autorización ambiental que permitía transformar la instalación pa quemar biomasa y combustible sólido recuperáu procedente de residuos. La sala considera que lo que se pretendía facer na central nun yera una simple modificación d’una instalación yá existente, sinón la puesta en marcha d’una actividá distinta, la coincineración de residuos, sometida a una normativa ambiental más estricta.

La sentencia señala tamién carencies importantes na tramitación del proyeutu. Ente elles, la falta de concreción sobre les característiques téuniques de la nueva instalación, la indefinición sobre la composición y el porcentaxe del combustible deriváu de residuos que se pretendía utilizar y l’a ausencia d’una evaluación clara sobre’l destín de les povises y escories resultantes del procesu de combustión. Estes cuestiones, según el tribunal, introducen una incertidume incompatible cola normativa ambiental aplicable.

Según se valoró nel procesu, la cantidá de residuos que podría llegar a quemase na instalación algamaría decenes de miles de tonelaes al añu, ensin que quedara suficientemente definio cómo se xestionaríen los materiales resultantes nin qué impactu ambiental podría tener esa actividá. Por esti motivu, la sala conclúi que l’autorización concedida nun cumplía coles esixencies que marca la llexislación ambiental.

Dende’l Conceyu contra la Incineración valoren la decisión como una victoria importante del movimientu social y ambiental que dende hai años vien denunciando la posibilidá de quemar basura n’Asturies. El colectivu destaca que la movilización ciudadana y el trabayu xurídicu realizáu fueron claves pa llograr esti fallu xudicial.

Sicasí, insisten en que la historia nun termina equí. La sentencia ye recurrible y ye probable que Hunosa o les alministraciones implicaes intenten recurrila, polo que’l procesu xudicial podría siguir nos próximos meses. Por esi motivu, dende la plataforma señalen que ye necesario caltener activa la defensa llegal, popular y técnica que fixo posible esti resultáu.

Cola intención de poder afrontar los posibles recursos y los gastos que supón el procesu, el Conceyu contra la Incineración decidió reabrir la so campaña de micromecenazgu. La iniciativa busca garantizar la defensa xurídica frente a nuevos recursos, disponer d’informes técnicos independientes que respalden el procesu, cubrir los costes xudiciales y alministrativos y reforzar el trabayu d’información y movilización social.

Dende la organización recuerden que la victoria nos tribunales ye un pasu importante, pero que la defensa del fallu y de la protección ambiental va siguir siendo necesaria pa evitar que la quema de residuos na térmica de La Pereda vuelva intentase per otra vía. La campaña de recaldación y la recoyida de firmes siguen actives y el colectivu anima a la ciudadanía a participar, bien seya con aportaciones o compartiendo la iniciativa, porque cada apoyu suma na defensa d’esta victoria social y ambiental.