Pente les munches fogueres qu’allumaron ayeri Xixón y Asturies entera, denguna con tantu significáu como la llinia de fuéu cola que se reclamó l’indultu pa Les 6 de La Suiza.
Anueche en Poniente xuniéronse dos tradiciones asturianes, les fogueres de San Xuan y la llucha polos derechos obreros y sindicales. L’actu, entamáu pol Comité de Sofitu a les 6 de La Suiza, prendió llames dende la Punta Liquerique hasta lo alto Cimavilla pa vindicar que facer sindicalismu nun ye delitu. L’actu foi visible dende toles sableres, onde la xente esperaba pa cellebrar la Foguera de San Xuan. 200 antorches incendiaron l’skyline de la ciudá, 200 voces glayando al altu la lleva, “6 de La Suiza, llibertá”, recordando a toos y a toes que’l de La Suiza ye un xabaz intentu de criminalización del sindicalismu, minutos enantes del prendíu de la foguera de San Xuan, en solidaridá coles 6 condergaes, a piques d’entrar na cárcel pol “delitu” de protexer a una compañera supuestamente acosada llaboral y sexualmente pol patrón. La próxima protesta, el 29 de xunu, na movilización pola llibertá de Les 6 de La Suiza, que, a les 12:30 h, nel Paséu Begoña (Xixón), convoquen tolos sindicatos asturianos. Pa tar al día de les movilizaciones y del casu de Les 6 de la Suiza, visitái les sos redes sociales y la so páxina web.
Nel Dos Santos
This work is licensed under a Creative Commons Attribution 4.0 International License.
