Los Seis finalistes que pasen a la siguiente fase de la Meyor Primer Sidre L’Añu son Germán, Cabueñes, Huerces, Prau Monga (Viuda de Angelón), La Morena y Piñera. Competirán pol títulu que les reconoz comu la meyor d’esta collecha na final del miércoles nueve d’abril de la que saldrá la sidre oficial del XV Certame de la Primer Sidre l’Añu
El xuráu, compuestu por seis persones con Manuel G. Busto y Joaquín Fernández al frente, ambos tastiadores de renombre nel mundiu la sidre, valoró sidres presentaes a concursu nuna duple tastia a ciegues que dio como finalistes a seis llagares, que concurrirán a la final, que tendrá llugar a les 18:30 la tardi na sidrería La Montera Picona de Ramón.
Los seis llagares escoyios son Germán (Avilés), La Morena (Viella), Cabueñes (Xixón), Huerces (Xixón), Piñera (Xixón) y Viuda de Angelón (Nava).
Pa la final, el sistema sedrá tamién de tastia a ciegues a duple ronda, siendo les tasties y deliberaciones del xuráu abiertes al públicu, cuntándose cola asistencia de los llagareros que pasaron a la final. Amás del primer premiu, que convierte a la sidre ganadora na oficial de la Primer Sidre l’Añu, que se cellebra del 17 al 20 d’abril na Feria Muestres de Xixón, entregaránse dos reconocimientos al segundu y tercer llagar clasificáu; una bones finalizáu’l concursu podrán probase les sidres finalistes.
Esti certame, entamáu pola FUNDACIÓN ASTURIES XXI, ye ún de los concursos de sidre más importantes del país, siendo l’únicu que valora la sidre sobre la madre, ello ye, ensin trasegar ya’l segundu en cuantu a númberu de llagares participantes.
Sidre sobre la madre
Dende hai 15 años LA SIDRA y la Fundación Asturies XXI escomenzaron a trabayar pola recuperanza de la sidre ensin trasegar, que práuticamente desapareciere del mercáu pola industrialización de los llagares y l’aplicación xeneralizada de los trasiegos. Ca vuelta son más los llagares que s’animen a comercializar esta triba de sidre y que participen nesti certame.
Susana Sela
This work is licensed under a Creative Commons Attribution 4.0 International License.
