El plan qu’ufren dende la Revista LA SIDRA y la Fundación Asturies XXI pa esti 18 de marzu, Vienres Santu, ye’l Sidracrucis, una peregrinación que visitará, amás de los chigres de Xixón y la Primer Sidre l’Añu, les espiches más auténtiques y los chigres de Llaviana, nun percorríu folixeru en bus pela xeografía sidrera
¿Nun sabes qué ye’l Sidracrucis? (pica equí)
La salida del Sidracrucis’25 va ser de Xixón a les doce’l mediudíe, col repartu de camisetes y credenciales. Caerán ya entós los primeros culinos y igual ya s’entama a afinar la voz col himnu oficial del Sidracrucis. El gaiteru marcará la hora de salir en peregrinación camín del primer chigre, y dende entós ya nun hai parar que valga: los chigres de Xixón, la macroespicha de la Primer Sidre l’Añu (esti añu na Feria de Muestres), una espicha de les d’anantes nel conceyu que meyor conserva la tradición, Llaviana, los chigres de La Pola y una espicha final de restallu na Fonda’l Trasgu, parriba Villoria.
Cualquier sidreru sabe qu’esto va necesariamente xunío a muncha folixa, munches rises, muncha música ya’l meyor ambiente posible, un plan perfechu pa cellebrar la Semana Santa a la asturiana que puen esfrutar tanto sidreros veteranos comu amateurs con ganes de somorguiase de guelpe nel universu sidreru. Una esperiencia única.
Suena a muncho, pero la verdá ye que los pinchos y les fartures coles que los peregrinos acompanguen la sidre faen la cosa muncho más llevaero. Una folixa de les de recordar, too incluyío (Sidre, pinchos, xinta, espiches, camiseta, bus, gaiteros y vasu commemorativu) por namás 80 euros.
Susana Sela
This work is licensed under a Creative Commons Attribution 4.0 International License.
