Bonos díes, bona xente.
Alborecemos col cielu empuercáu de nubes medies y altes ya con unes temperatures que tan alrodiu de los 8ºC, rexistrándose nel puirtu Payares 3,9ºC.
Güei vamos tener nubosidá media-alta, l’aire sedrá sele ya variable y les temperatures suaves que mos dexarán un ambiente primaveral.
Mañana domingu refrescará dalgo ya tendremos nubosidá baxa na metá norte d’Asturies que pue dexar dalgo d’orpín a primeres hores. A partir del mediudía dirán abriéndose dellos claros o abancios y les temperatures másimes baxarán moderadamente anque l’ambiente seguirá siendo suave pa les feches nes que mos atopamos.
El llunes alboreceremos con escasa nubosidá y dalguna xelada feble ya dispersa, amás podrán surdir nublines y borrinos no fonderu los valles. Durante’l día la llume del sol calecerá l’ambiente siendo de nuevu primaveral.
Durante los siguientes díes dirán subiendo les temperatures y la sensación sedrá braniega.
Que paséis un bon sábadu collacies ya collacios.
Semeya que mos l’apurre la nuesa collacia Consuelo Vazquez
This work is licensed under a Creative Commons Attribution 4.0 International License.
