Lata de Zinc (Uviéu) acoyerá les actuaciones d’Abéu, Ferla Megía, Alienda, Melandru. Amás, por primer vegada va cellebrase una jam session pa la mocedá en L’Esperteyu
A dos selmanes escases de la cellebración del tercer festival de música moza n’asturianu Semando Fest, entamada por Musicasturiana.com y Ixuxú Cultura, ya tan vendies más del 40% de les entraes que, por doce euros (diez pa menores de 26 años) permiten asistir a les actuaciones de cuatro grupos mozos de perbona calidá y estilos bien estremaos.
Abéu entama’l conciertu con tradición y un repertoriu fechu pal baille nel que les voces y la percusión son trotagonistes. Darréu Ferla Megía fadrá una propuesta mui novedosa qu’axunta dembow, rap, pop, folk, trip hop, electrónica… con una potente puesta n’escena. Los terceros van ser Alienda, una banda de power folk con 10 años de camín qu’herieda lo meyor d’esti xéneru n’Asturies. Melandru presllará’l conciertu col so post-rock con influencies del shoegaze y del dream pop,una propuesta única dientro de la escena del rock fechu en llingua asturiana.
La cita ye’l ochu de febreru a les 20 hores en Lata de Zinc y tolos músicos y músiques participantes son menores de 35 años, la mesma edá que permite la llibre participación na jam session programada el día anantes a les diez, nel chigre musical L’Esperteyu de manera paralela al festival.
Les entraes anticipaes tán a la venta en musicasturiana.com a 12 euros (10 euros pa persones menores de 26 años).
This work is licensed under a Creative Commons Attribution 4.0 International License.