Lluvia y ascensu les temperatures “
Alborecemos col cielu mui nuboso y precipitaciones febles con unes temperatures que tan alrodiu de los 9ºC, rexistrándose nel puirtu Payares 5,1ºC.
Güei vamos tener nubosidá abondosa con precipitaciones febles que sedrán más probables pela mañana con tendencia a remitir al atapecer. Les temperatures n’ascensu y l’aire ábrigu con raches fuertes en zones de montaña y puntos del llitoral a partir del mediudía.
Mañana sábadu tendremos nubosidá pero sin precipitaciones cola apertura de dellos claros durante’l día, amás les temperatures siguen subiendo y l’aire sedrá del sur sele en xeneral con tendencia a coyer puxu a última hora.
El domingu lo más destacáu sedrá l’aire ábrigu que va soplar con raches fuertes en zones de montaña ya en puntos del llitoral, empobinando nubosidá a la fastera surocidental d’Asturies, onde nun se descarta dalguna precipitación, nel restu predominarán los claros o abancios y les temperatures van seguir subiendo.
El llunes día de reis, descenderán les temperatures al rolar el vientu a componente noroeste ya tendremos dalguna precipitación con nevaes febles pela cordelera.
Que paséis un bon vienres collacies ya collacios.
Semeya que mos l’apurre la nuesa collacia Consuelo Vázquez
This work is licensed under a Creative Commons Attribution 4.0 International License.
