Bonos díes, bona xente.
” Van ganando terrén les xelaes”
Alborecemos col cielu escampláu ya con unes temperatures que tan alrodiu de los 3ºC pero xelando yá no fonderu los valles, rexistrándose nel puirtu payares 1,5ºC.
Güei vamos tener el cielu escampláu y la llume del sol dirá caleciendo l’ambiente que sedrá afayaizu a primera hora de la tarde, dempués al atapecer volverá a enfriar en forma xelando al finar el día no fonderu los valles.
Mañana martes últimu día del añu tendremos un día mui asemeyá col cielu escampláu y xelaes al alborecer en munches zones d’Asturies que mos dexarán un ambiente ivernal pela mañana pero qu’a primera hora de la tarde va tar afayaizu ellí onde mos de’l sol.
El primer día del añu miércoles lu entraremos col cielu escampláu y xelaes xeneralizaes no fonderu los valles pero a lu llargu’ día dirán surdiendo nubes medies y altes pero sin más consecuencies, con unes temperatures que van camudar poco, calteniéndose un ambiente ivernal pela mañana y más afayaizu a primera hora de la tarde.
El xueves al final nun tendremo una entrada fría y quedará la cosa en cuatro gotes y dalgo de nieve nes cumes más altes de la cordelera perriba de los 2000m, pa más a lantre gana terrén la posibilidá de predominiu del aire ábrigu con subida de les temperatures y pasu de dalgún frente atlánticu, pero esto yá lu diremos viendo.
Que paséis un bon llunes collacies ya collacios.
Semeya que mos l’apurre’l nuesu collaciu García Xurdin.
This work is licensed under a Creative Commons Attribution 4.0 International License.
