Una ventena d’artistes donen obres que van subastase pa recaldar fondos destinaos a financiar el contenciosu contra’l proyectu d’investigación minera en Peñamayor
L’asamblea de Nava de la plataforma Salvemos Peñamayor impulsó un contenciosu alministrativu coles mires de poder frenar el permisu d’investigación minera qu’afecta a la redolada de la Sierra de Peñamayor.
Esti permisu d’investigación minera (de cobaltu, cobre, níquel, oru y plata) concedíu pol Gobiernu del Principáu d’Asturies a la empresa británica Technology Minerals PLC afecta a 217 cuadrícules mineres nos conceyos de Bimenes, Llaviana, Nava y Piloña.
Pa sufragar los gastos del contenciosu desendolcáronse ya delles iniciatives, dende la vienta de chapes y camisetes, la rifa d’una cesta solidaria de productos donaos por negocios de la zona hasta un crowdfunding na plataforma migranodearena. La postrera propuesta ye esta puya d’obres d’arte.
Artistes de distintos disciplines donaron obres que van ser puyaes coles mires de cubrir parte de los gastos del contenciosu alministrativu qu’impulsaron los vecinos de Nava de la plataforma Salvemos Peñamayor. Ente los donantes atópense nomes reconocíos de la escena artística asturiana como Breza Cecchini, Mario Cervero, o Juan Giordano ente otros. La puya va tar dirixida por Esther Fonseca.
Les obres van esponese dende’l vienres día 20 d’avientu a les 12:30 en La Naveta, Plaza Dominganes, 7, Nava. La puya va tener llugar nel mesmu llugar el domingu 22 d’avientu.
Nel Dos Santos
This work is licensed under a Creative Commons Attribution 4.0 International License.
