Alborecemos tovía con dalgo de nubosidá, anque yá ta escamplando pel oriente asturianu con unes temperatures que tan alrodiu de los 5ºC, rexistrándose nel puirtu Payares -3,3ºC.
Güei va dir dixebrándose la nubosidá del alborecer pa quedar el cielu poco nuboso en xeneral con unes temperatures másimes que subirán dalgo a primera hora de la tarde. L’aire sedrá sele ya variable.
Mañana vienres vamos tener dalgo de nubosidá durante’l riscar qu’impedirá que les xelaes seyen xeneralizaes pero al alborecer tenderán a dixebrase les nubes pa quedar el cielu poco nuboso o escampláu con unes temperatures que van camudar poco, calteniéndose un ambiente fríu, sicasí a primera hora de la tarde, ellí onde entre la llume del sol, suavizarán dalgo les temperatures.
El sábadu puen surdir intervalos nubosos al finar el día ya inclusu dexar dalguna gotera pero mayoritariamente predominarán los grandes claros o abancios durante’l día con xelaes al alborecer. Les temperatures seguirán siendo fríes a pesar del sol y l’ambiente ivernal.
El domingu nun tendremos camudos nel tiempu, col cielu poco nuboso en xeneral y temperatures fríes y el llunes yá tendremos les altes presiones bien aposetaes enrriba nuesu con un tiempu mui estable y soleyeru pero con xelaes en munches zones d’Asturies.
Que paséis un bon xueves collacies ya collacios.
Semeya que mos l’apurre dende la estación d’esquí Fuentes de Invierno na so páxina de facebook de la urbanización de la Raya ayeri al atapecer.
This work is licensed under a Creative Commons Attribution 4.0 International License.
