El Ministeriu de Facienda salta la llei y el resolvimientu del Conseyu de Tresparencia al ordenar nun espublizar la información sobro la inversión del Gobiernu d’España n’Asturies, ignorando dafechu la pidición del Principado.

“El réxime colonial del Estáu español n’Asturies ye tan absolutu qu’ensiquiera nun se molesta en disimular” -Andecha Astur-

Dende l’añu 2009 la Intervención Xeneral de l’Alministración del Estáu, departamentu del Ministeriu de Facienda, presentaba ca seis meses un informe detallando la inversión real del Gobiernu central en ca territoriu, nel que s’esplicaba lo presupuestao per ca ministeriu, organismu y empresa pública estatal y lo que finalmente s’executa. Estos informes taben disponibles n’abiertu na web, constituyendo la principal ferramienta pa supervisar el cumplimientu de lo alcordao nos Presupuestos Xenerales del Estáu.

el Gobiernu central decidió agora qu’esos informes dexen de ser públicos, pesi a que’l Conseyu estatal de Tresparencia, diseñáu pa velar pol cumplimientu de la llei homónima y que los sos resolvimientos son venceyantes, encamentó al ministeriu a facilitar los últimos informes y revelar “quién y en qué fecha” tomó la decisión de dexar d’espublizalos.

Agrava la situación el fechu de que la estadística s’oculte xustu nun momentu nel que’l financiamientu autonómicu ta en primer plana del alderique públicu y fáigase so motivos que nun son esplicaos; la impresión xeneralizada ye que la única xustificación ye disimular la pola probe execución de los presupuestos y la diferencia de tratu ente unos y otros casos, imponiendo la so voluntá perriba lleis, reclamaciones y por supuestu, perriba de les pidiciones del Principado, que reclamó conocer los datos.

Nesi sen dende Andecha Astur declaren que “El réxime colonial del Estáu español n’Asturies ye tan absolutu qu’ensiquiera nun se molesta en disimular. El ‘Principado’ como istitución impuesta dende Madrid nun pinta un res, una sucursal sumisa y servil. Asturies precisa poder políticu pa decidir el so futuru.”

Llucía F. Marqués