El preciu mediu del alquiler de vivienda n’Asturies allugóse n’ 8,6 euros por metru cuadráu al mes, algamando los 9’4 en Xixón y los 9 n’Uviéu. Esta xubía súmase al xorrecimientu del 15% de los precios nel 2023, cuando el preciu de los alquileres n’Asturies medró el triple que los salarios medios. 

576 € mensuales ye’l preciu mediu de los arrendamientos de vivienda en Xixón, siendo 350 € al mes el coste del pisu d’alquiler más baxu. Estos datos impliquen qu’un alquiler en Xixón lleva más de la metá d’un SMI, el 95% de los ingresos d’una persona que perciba l’IMV.

El preciu mediu d’alquiler de viviendes n’Asturies sube a los 874 euros al mes, lo que pue paecer una contradicción col fechu de que Xixón tien el preciu más caru por metru cuadráu; cenciellamente, les viviendes na ciudá son más piqueñes.

Seique la mayor medría en términos interañales se dió en Xixón, con un 10’3%, Uviéu y Siero nun queden atrás, con un xorrecimientu de los precios d’un 8.1%.

L’acaparación de viviendes pa usu turísticu y la compra de les mesmes por parte de foriatos ta na base de la menor disponibilidá que respalda esti xorrecimientu de los precios. Too ello tien como consecuencia la dificultá pa la emancipación de la mocedá asturiana, que nun pue acceder más qu’a trabayos precarios -principalmente cientraos n’hostelería y turismu- que de denguna manera permiten cubrir los costes de vivir pola so cuenta. 

Nel Dos Santos