L’Academia de la Llingua Asturiana anuncia la espublización del númberu 144 de la Coleición Toponimia, cientráu en Peñaflor, Gráu
La obra ye un trabayu de Xabiel Fernández García col que consiguiere un áccesit nel Concursu de recoyida de material toponímico oral. Nesti volume recuéyese la toponimia mayor y menor de la parroquia de Peñaflor, Grau, con un testu qu’ofrez delles notes hestóriques afitaes nuna documentación fonda. Cola de Peñaflor yá son seis les toponimies moscones asoleyaes nesta coleición.
Aparte d’esta recopilación, Xabiel Fernández García ye l’autor de dellos trabayos alrodiu de la toponimia del Conceyu Llangréu. La coleición Toponimia recueye los nomes de llugar asturianos según la tradición oral y con una curtia descripción de caún gracies a les informaciones los falantes y conocedores de la xeografía.
La publicación ta disponible nes llibreríes asturianes y na llibrería del llar social de l’ALLA, n’Uviéu.
Susana Sela
This work is licensed under a Creative Commons Attribution 4.0 International License.
