Quien quiera participar tien de tar sollerte: el plazu, qu’entamó l’un de xineru, fina’l nueve d’esti mesmu mes
Iniciativa pol Asturianu entamó esti llunes, 1 de xineru, la votación de la ‘Meyor noticia pal asturianu en 2023’. D’esta manera, la organización pretende escoyer, pente medies d’una votación popular n’internet, la meyor noticia pal idioma nel fináu añu 2023.
La organización apuntó que “tamos mui contentos porque esta iniciativa estrenóse nel añu 2013 y cumple 11 años recoyendo bones noticies pal idioma.Ye una manera de faer repás a les tantes bones noticies pal asturianu, pa valorar el camín que tamos abriendo pa salvar la llingua asturiana y pa garrar fuercies pa trabayar esti añu qu’acaba d’empecipiar”.
Pa Iniciativa pol Asturianu esta votación ye importante porque “con esta campaña pretendemos facer llegar a la ciudadanía asturiana delles bones noticies pal nuesu idioma. Tamién val pa revisar tol llabor d’Iniciativa pol Asturianu y pa comprobar cómo añu a añu la llingua asturiana tien una repercusión positiva nos medios de comunicación”.
Los y les participantes pueden escoyer ente un total de 17 bones noticies pal asturianu de diferente tipu d’un total de 34. Cuestiones comu la presencia del asturianu en dellos foros internacionales, l’usu del asturianu en medios públicos, cartelería ya incluso nel Congresu, dellos premios, personalidaes reconocies o eventos alrodiu l’asturianu, son dalgunes de les noticies escoyies.
La votación entamó esti llunes 1 de xineru y va acabar el martes 9 d’esti mes. Amás, los y les participantes van participar nun sortéu d’un llote de llibros n’asturianu.
Susana Sela
This work is licensed under a Creative Commons Attribution 4.0 International License.
